انا بصراحه اول مره اكتب موضوع عشان اقول فيه حاجه يعني مواضيعي كلها كنت بسأل فيها عن حجات او كده بس لما لقيت بنات كتييييييييير اوي بتسأل علي موضوع التخن ده حسيت اني عندي حجات ممكن افيد بيها بأذن الله عشان كان ليه تجربه اوي ف الموضوع ده انا اصلا أكلي مش قليل بس برضه كنت اكل اكل ميبانش عليا لحد مخدت قرار اني اروح ل دكتورة بتاعة تغذية و قد كان
المهم بقا يا موزز ان أنا الحمد لله و قولو ماشاء الله زدت معاها اكتر من 13 كيلو ف اقل من شهرين تقريبا يعني كنت بذيد بتاع كيلو و نص كده كل اسبوع و ده يعتبر اعجاز يعني
بصو هو انا هقولكو النظام بس هو كبير شويه يعني ممكن تستكتروه بس هو و الله بيجيب نتيجه تحفه ان شاء الله و اللي ناويه تتخن اهم حاجه ف الموضوه الإنتظااااااااااااااااام و انا قلت اهو و هفضل اركز عليها عشان في بنات بتبقي واخده الموضوع جد اول كام يوم و اللا اسبوع و بعدين تزهق و اللا تستعجل و توزن تلاقي نفسها مذادتش تقوم تكسل و ترجع ف كلامها الكلام ده مينفعش خالص
بصو انا هقولكو الموضوع ف نقط كده عشان متتوهوش مني
_________________________________________________
الحجات المهمة :
** توكلي علي الله كده و ادعي ربنا باللي انتي عايزاه عشان ان شاء الله كل حاجه تمشي تمام و تجيب النتيجه اللي انتي عايزاها و احسن كمان لان الدوا ده مجرد سبب و اي حاجه بتحصل من عند ربنا و طبعا سمي الله قبل اي اكل او دوا تحطيه ف بقك عشان تنتفعي بيه منبقاش احنا بناكل و شوشو هو اللي بيتخن و اللا ايه .
**متستعجليش و توزني نفسك علطول يعني مشي ع النظام اسبوعين كده اقل حاجه و بعدين روحي اوزني و طبعا هتوزني نفسك قبل ما تبدأي .
** انا اول مبدات اول اسبوعين كده ذدت زي مقولتلكو يعني ف الاسبوع كيلو و نص و دي كانت نتيجه كويسه اوي و اتشجعت بقي و بقيت باكل اكل مفيش كده يعني و روحت وزنت بعد كده و انا متوقعه اني هبقا اييييييه بقا لقيت نفسي زي منا مذدتش جرام و الاسبوع اللي بعده برضه نفس الكلام بعد كده عرفت اني دي طبيعه الجسم زي مبيحصل مع الناس اللي بتعمل دايت بيوقف شويه و يكمل تاني و لما روحت الاسبوع اللي بعده لقيت نفسي اصلا زايده 4 كيلو مره واحده يعني لو حصل كده مع واحده متقلقش و ميجيلهاش احباط و تكمل عادي جدا .
** الكلام ده كلو للناس اللي مش بتتخن من غير سبب يعني لازم تكوني متأكده الاول ان مش عندك انيميا و لا ديدان و لا مشكله ف الغدة الدرقيه لإن كل دول ليهم موال تاني .
** نصيحه مني لما تروحي تجيبي الدوا احسبي كده انتي هتستهلكي منو اد ايه ف شهر مثلا و هاتيه مره واحده معلش تعالي علي نفسك كده و حوشيلك مبلغ و هاتيه هو اصلا مش حجات غاليه بس عشان متكسليش بعد كده و متسقطيش و لا جرعه لو لقيتي اي حاجه منهم خلصت و ملحقتيش تجيبيها علطول .
__________________________________________________ ________________
دلوقتي بقا هقولكو ع الادويه و محدش يقوللي غلط و هرمونات و الكلام ده بالله عليكو انا صيدلانيه و عارفه كويس كنت باخد اييه ف متقلقوش
الادويه :
** تريزوركس شراب ملقيتهوش هاتي بيريافيت ملقيتهوش و كده يبقي انتي نحس هاتي موسيجور اقراص بس الافضل الاولانيين .. دول فواتح شهيه هتاخديهم قبل اي وجبه ب نص ساعه مش اقل عشان يلحقو يشتغلو .. و دول بيجيبو نوم شويه ف اول كام يوم بس بعد كده خلاص مش هتحسي ب حاجه .. اول واحد ب 7 و التاني ب 3 و التالت ب 6 جنيه .
** دايجستين اقراص او زيموجين اقراص خدي ده اسبوعين و ده اسبوعين بدلي بينهم يعني ..بيتاخد قرص بعد الاكل مباشره و ده هاضم و فاتح شهيه و طبعا هاضم عشان تجوعي بسرعه و كمان عشان يذود استفاده جسمك بالأكل اللي كلتيه .. ده الشريط ب 2 جنيه .
** جروث فورميولا / بيوتك / بيوجاينرز التلاته دول عباره عن علبه كبيره كده فيها بودر بتاخدي منو معلقتين كبار تدوبيهم ف كوبايه لبن مفيش لبن او مش بتحبيه يبقي ف مياه انا كنت بحليه ب سكر بس عشان انا اصلا بحب الحاجه مسكره زياده ف لو عاجبك كده تمام اصلا هو طعمو حلو اوي هو بالشيكولاته ف طعمو زي الكاكاو باظبط هتبدلي بين التلاته يعني علبتين ة تجيبي اللي بعده و كده .. ده هتاخديه مره بعد كل وجبة و ده بالذات حطي ميت خط تحت الانتظام اوعي تطنشيه عشان مهم .. الاول ب 28 و التاني ب 22 و التالت ب 25 و العلبه هتكفيكي تقريبا اسبوع دول يعتبرو اكتر حاجه مكلفه فيهم بس مهمين اوي .
** ترياكتين اقراص تاخدي قرص واحد قبل النوم و ده فاتح شهيه برضه .. ده الشريط ب 2.5 فيه 20 حبايه .
** سوبرافيت كبسول ده فيتامينات تاخدي كبسوله واحده بعد الغدا و ممكن توقفيه اسبوعين كده ف النص و تجيبي كبسول بركه 500 ده خلاصه حبه البركه مقوي عام و منشط و بيزود الشهيه .. الاول العلبه ب 10 جنيه بتكفي شهر و التانيه العلبه ب 4.5 شهر برضه .
** حقن ديبوفيت و محدش يعيط مهمه اوي يا جماعه معلش تعالو علي نفسكو انا و الله كنت لو بموت لا يمكن اخد حقنه بس لجل الورد بقي زي مبيقولو دي هتاخديها 3 مرات ف الاسبوع اول 3 اسابيع و بعد كده مرتين بس و متخافوش هي بتوجع اول مرتين كده بس بعد كده الجسم بيتعود ع الدوا و مبتحرقش خالص و الله .. دي الامبول ب 3.5 .
** حبوب خميره دي ف برطمان كده تاخدي منها حبايتين بعد كل وجبه و دي ب 6 جنيه فيها 60 قرص .
__________________________________________________ ___________
كده الدوا تمام اقولكو بقا شويه ملحوظات ع الاكل :
** كلي رز و مكرونه كتييييييييير و لما تملي الطبق قدامك امليه كبير كده و قوليلو يانا يانت هخلصك يعني هخلصك اصلا واحده واحده هتحسي انك معدتك بتوسع و بتاكلي كميات لا يمكن كنتي تتخيلي انك تقدري عليها انا وصلت لمرحله اني كنت مهما كلت مبشبعش اه و الله كنت بزهق و بقوم بقي و خلاص .
** اشربي حلبه اللي هي المطحونه اللي زي السحلب دي كل يوم كبايه و يا سلام لو تقدري علي اتنين يبقي زل الفل بس اعمليها بلبن و لو عندك شويه مكسرات كده حطي عليها شويه هتبقي عسل لا و كمان هتظبطلك المناطق اياها بقا انتو عارفين انا قصدي ع الخدود اوعو تكونو فهمتوني صح .. انا بقرف اوي م الحلبه العاديه بس دي طعمها حلو و الله و كمان كنت بشربها ف الصيف و لا كنت بلاقيلها اي ريحه .
** كمان الكاكاو باللبن مهم اوي اضربيلك كل يوم كده كبايه قبل متنامي .
** طبعا مفيش حد مبيحبش البطاطس المحمره كل متلاقي نفسك فاضيه حشي حمريلك طبق محتم كده و حطي عليه شويه كاتشب علي مايونيز و أزأزي كده و انتي قاعده ع النت و اللا اودام التلفزيون .
** عسل اسود بالطحينه جامد اوي حديد و سعرات بالهبل و طعمه حلو حطيلك طبق مع الفطار و طبق مع العشا و كمان الحلاوه الطحينيه حلو اوي بدلي بينهم كده عشان متمليش .
**سوداااااااااني ايون هاتيلك كيلو كده خبيه ف اي درج عشان محدش ف البيت يسرحلك عليه و أزأزي طول منتي قاعده و طبعا لو تقدري تجيبي مكسرات تانيه بقي خير و بركه .
** ليكي بقا ف الجاتوه و الحجات دي اديها مترحميهاش هتعمل شغل جامد برضه
هي و الشوكلاتات و خصوصا سنيكرز .
** لازم تاكلي كذا وجبه ف اليوم يعني جنب التلات وجبات الاساسيه اللي طبعا مستحيل نوقع ولا واحد منهم لازم ناكل بينهم كمان اي حاجه م الحجات اللي انا كتبهالكو دي .
** ناكل 5 زتونات سوده كل يوم مع الفطار .
** التمر حلو اوي لو بتحبيه باللبن هاتي تمر ناشف و بليه بيبقي تحفه لو ملكيش فيه هاتي العجوه اللي ف السوبر ماركت دي و برضه اتسلي بيها بين الوجبات و يا سلام لو عملتيها بالسمنه كده و كلتيها بالعيش بتبقي تحفه و الله .
** طبعا انا مش محتاجه اقوكو ايه اللي ف الكل العادي بيزود الوزن اكيد كلنا عرفين يعني محاشي بقي بشاميل مكرونات معجنات كل ده طبعا مهم هي الدكتوره كمان كانت كتبالي نظام غذائي متحدد فيه بالظبط بس انا بصراحد مكنتش بمشي عليه بالظبط اوي يعني كنت بعدل من عندي بس مش لاقياه دلوقتي هدور عليه و اجيبهولكو بس عموما انا قولتلكو اكلات الغدا بالنسبه للفطار و العشا ادوها بقي بيض مقلي فول بالزيت قشطه مربي عسل بالطحينه حلاوه زي مقولتلكو و طبعا بطاطس . و طبعا البيض اللحمه الفراخ السمك اي حاجه هتبقي متحمره مش مسلوقه بس و لا مشويه .
__________________________________________________ ___________
ف الاخر بقا كلامي مش موجه للي عايزه تتخن بس مكسله و الكلام ده , كلامي موجه للناس اللي متعقده ووزنها عاملها مشكله و مستعده تتشقلب عشان تتخن و تحس بالفرق عشان النظام طويل و محتاج متابعه و اصرار اوي يعني و زي مقولتلكو ف الاول اهم حاجه الاستمرار يعني تفضلي مكمله شهر اتنين تلاته لحد متوصلي للوزن اللي انتي عايزاه و متستعجليش النتيجه لان كل واحده طبيعة جسمها مش زي التانيه .
انا قولتلكو اني اول مره اعمل موضوع و ربنا اعلم انا تعبت فيه اد ايه بس و الله عشان كان نفسي افيد و لو واحده بس حتي و اكون سبب بعد ربنا انها تحقق حاجه هي عايزاها عشان انا عارفه اد ايه الموضوع بييقي مأثر علي نفسيه البنت و تعليقات بقي و كلام من ده ف ياريت الله يكرمكو متكسفونيش و ارفعو الموضوع بردودكو و تقييماتكو عشان اكبر عدد يستفيد ان شاء الله و ادعولي دعوه حلوه كده بظهر الغيب ان ربنا ينولني اللي بتمناه و اي واحده عندها اي استفسار انا تحت امرها ف اي وقت
nahla 27211 nahla 27211 571416_3.gif فتكات رائعة Fatakat 571416 البحيرة – مصر