السلام عليكم حبيباتى البنات
عملت موضوعى الاول وانتوا شجعتونى واتمنى يستمر التشجيع للنهايه
النهارده جايبه لكم اكله سهله جدا للمبتدئين و لمحبى اضافه التكات لاكلاتهم
دى اكله سريعه تقدرى تعمليها فى اى وقت بس المهم النفس والنكهه الحلوه وطريقه القديم ولازم تبقى السفره كلها تفتح النفس على الاكل
المنيو
مكرونه اسباجتى
فراخ بانيه
شوربه خضار باللحمه
سلطه
مخلل عمايل ايدى
ميلك شيك موز بالحليب
تابعو معايا وان شاء الله كل يومين ننزل حاجه جديده للمبتدئين والمحترفين
اولا : المكرونه الاسباجتى بالطماطم والتوم
اول حاجه هنسلق المكرونه .. هنجيب حله ونحط فيها شويه ميه ونتأكد انها مش قليلهعلشان متضريش تضيفى ميه مغليه لو قلت منك
هنحط الحله على النار ومعاها رشه ملح خفيفه ومعلقتين زيت علشان المكرونه متلزقش فى بعضها ويبقى طعمها حلو
لما الميه تغلى هنجيب المكرونه الاسباجتى ونكسرها بأدينا نصين علشان متبقاش طويله اوى ونقعد نشفط ^_^
ونحطها فى الميه المغليه
ناخد بالنا اننا مننسهاش على النار وبعد خمس دقايق تقريبا هتكون استوت ولازم تبقى ماسكه نفسها ومش مهريه
واول ماتستوى هناخدها على الحوض فى مصفه تحت الميه البارده علشان النشا الزياده ينزل منها ونرجعها تانى للحله الفاضيه لحد مانعمل الصلصه
كدا المكرونه استوت وندخل على الخطوه التانيه اللى هيا صلصه المكرونه وانا ماشيه الخطوات بالتفصيل علشان المبتدئين فى المطبخ
طريقه صلصه الطماطم
هنجيب حله ونبشر فيها بصله وفصين توم وقرن فلفل حامى ( اختيارى ) وحته سمنه ونحطهم على النار لحد ما البصله والتوم يتشوح وتطلع ريحيتهم الحلوه بس خلى بالك لحسن تحرقيهم
هنضرب فى الخلاط كام طمطمايه على حسب كميه المكرونه ولما البصل والتوم يصفر هنضيف عليهم عصير الصماطم وشويه ملح وفلفل و شطه ونسيبهم على النار لحد ما الطماطم تتسبك وتتحول من عصير طماطم خفيف لصلصه مركز وميبقاش فيها ميه خالص
واخر خطوه اننها هنجيب المكرونه اللى احنا سلقناها ونحطها على الصلصه ونقلبها لحد ما المكرونه تمتزج مع الصلصه كلها ونغرفهم ونحط على الوش شويه بقدونس او ريحان على حسب الرغبه فى النكهه وبالهنا والشفا
مش عاوزه منكم غير دعوه طيبه بظهر الغيب ربنا يحفظ زوجى وابنى ويجعلنا اسره صالحه ,ويجعل كل حاجه كويسه نقصد بيها الخير صدقه جاريه لينا بعد مماتنا يارب
واوعوا تنسوا التقييم علشان اكمل معاكم كل الوصفات
تابعونى
هنجيب الفرخه وهيا لسه نيه وناخد الصدر بتاعها ونقطعه شرايح بس نخلى بالنا متبقاش الشرايح تخينه ولا رفيعه اوى
يااما بنشترى طبق صدور فراخ جاهز ومتقطع وانا كان عندى طبق جاهز فى التلاجه وان شاء الله فى مره هنعرف ازاى نخلى الفرخه بطريقه سليمه
هنجيب صدور الفراخ ونغسلها كويس فى ملح وملح و نقطه خل علشان ميبقاش فيه اى ريحه
ونجيب طبق نحط فيه بصلتين مبشورين وكام فص توم مهروس وفلفل أخضر حار وملح وفلفل اسود وبهارات وشويه شطه خفيفه وشويه خل او ممكن ليمونه ونقلبهم على بعض
وناخد صدور الفراخ وحده وحده ونملاها بالتتبيله دى ونرصهم فوق بعض والميه الباقيه نحطها فوقهم ونسيبهم على الاقل ساعتين علشان الفراخ تشرب التتبيله وتبقى من جوها لحمها متبل ولذيد
بعد ساعتين هنحط طاسه على النار وشويه زيت ومنحطش زيت كتير علشان بعد البانيه بنرمى باقى الزيت علشان بيقع فيه بواقى تتبيله وفيجيتار
هنحط الطاسه على النار لحد ما الزيت يقدح ونجيب طبق البانيه وطبق نحط فيه بيضتين ونقلبهم وطبق نحط فيه فيجيتار او بقسماط على حسب الرغبه
هناخد واحده واحده من صدور الفراح ونشيل منها التتبيله خالص ونخليها مفيهاش اى تتبيله وبعدين نحطها فى البيض وبعدين الفيجيتار وعلى الطاسه على طوووول
ولو عاوزاها تبقى عامله زى الفراخ المشويه هاتى طاسه تيفال وقللى الزيت ووطى النار هتلاقيها اتحمرت وعامله خطوط زى المشويه وطعهما مش هقولكم روووووووووووووعه
وطبعا هنطلعها فى طبق فيه مناديل علشان تصفى الزيت
وبالهنا والشفا
تابعونى ومتنسوش التقييم ياقمرات محدش بياكلها بالساهل ^_^
شوربه الخضار باللحمه
بالنسبه لشوربه الخضار دى اكله سهله جدا وتقدرى تعمليها جنب اى اكله ومغذيه لانها فيها انواع كتير من الخضار وبتاخد اى خضار موجود عندك وطبعا بنعملها للاطفال او اللى الدكتور منعه من المسبكات واحلى شوربه خضار هيا اللى معموله على شوربه لحمه
اول حاجه هنجيب اللحمه بتاعتنا ونقطعها على حسب الحجم اللى احنا عاوزينه ونغسلها كويس بالميه والملح علشان نبقى ضمنين نضافتها ولو فيها اى دهون ياريت نشيلها لان ميزه الشوربه انها خفيفه وبعيده عن الدهون
هنجيب حله ونحط فيها كميه ميه تكفى اللحمه وزياده لاننا محتاجين الشوربه بتاعتها مش هنسويها وخلاص
ونقطع فيها بصله وطمطمايه وشويه ملح وفلفل و حبهان وورق لورو ومعلقه صلصله علشان ميبقاش لونها ابيض اوى زياده عن اللزوم والصلصه بتديها طعم حلو
هنحط الحله بالمكونات اللى قلناها على النار ونحط فيها اللحمه ونسيب اللحمه لحد ماتستوى
واوعوا اوعوا تحطوا الخضار مع اللحمه وهيا لسه نيه لانها بتحتاج سوى كتير .. لازم نحط اللحمه الاول تستوى وطبعا منسيبهاش تتهرى لانها لو استوت زياده الفوايد اللى فيها بتروح
هنسيب اللحمه تستوى ونجيب كل الخضار اللى عندنا واللى المفروض يكون ( بطاطس .. بسله .. جزر .. فاصوليا .. كوسه .. بروكلى .. قطع قرنبيط صغيره .. ) واى خضار تحبى تضيفيه او الخضار المتاح ليكى وكل مانوعتى فى الخضار كل مازودتى الفايده والقيمه الغذائيه لطبق واحد بتقدميه لاولادك
هناخد الخضار ونغسله كويس ونقطعه مكعبات وبعد مااللحمه تستوى هنضيف عليها كل الخضار اللى عندنا وندوق الملح علشان نتاكد انه مظبوط ولو الشوربه قلت نزودها الاول ميه وبعدين ندوق الشوربه علشان شوربه الخضار بتحتاج شوربه كتيره
الخضار مش هياخد كتير على النار بس اهم حاجه الكوسه والبطاطس قطعيها كبيره شويه علشان تستحمل التسويه
ونغرف الشوربه واللحمه وبالهنا والشفا
تابعونى ومتنسوش التقييم مش كل شويه افكركم ^_^
السلطه
طبعا السلطه سهله واى حد ممكن يعملها
مكوناتها طمطاطم وخيار وفلفل وقرن شطه وجزر وخضره وبصل وعليهم لمونه ونقطه خل وشويه زيت زيتون وملح
وبردو الخضار اللى هتحطيه فى السلطه على حسب رغبتك انتى وحبك ليه … يعنى مثلا فيه ناس بتحب تحط توم وناس لأ وفيه ناس بتحب تحط ذره وفيه ناس بتحط الكرنب والخص وناس مبتحبش
يعنى من الاخر اختارى الخضار اللى بتحبيه وقطعيه قطع صغيره علشان يبقى شيك واعصرى فوقهم نص لمونه ومعلقه صغيره خل ومعلقتين زيت زيتون وشويه ملح وقلبيهم كويس ودوقى الملح ولو هتحطى قرن شطه حامى يبقى متحطيش شطه حمرا بودره ولو مش هتحطى قرن الشطه يبقى تحطى شويه شطه حمرا وميكونش كتير لان فيه ناس مبتحبش الشطه الكتير
وتغرفيه فى الطبق وبالهنا والشفا
طريقه تخليل الخيار والجزر … هنجيبهم ونغسلهم كويس ونقطعهم بالطول ونحطهم فى برطمان وعليهم ميه مغليه وملح اكتر من العادى وشويه خل وقرنين شطه حاميه متقطعه علشان تديله لمحه حراقه ونقفل عليهم وبعد يومين دوقى احلى وابسط مخلل
اللفت هنجيبه ونقشره ونقطعه مكعبات ونقطع العروق بتاعته صغير ونحطه فى برطمان مع ميه مغليه وملح وخل وقرنين شطه حاميه متقطعه على حسب كميه اللفت اللى عندى
الشطه هنعمل فيها نفس الخطوات بس هنضيف عليها فصين توم مقشرين ومهروسين
وبالهنا والشفا
الميلك شيك
هنجيب اى فاكهه عندنا سواء موز او فراوله او حتى شيكولاته ونحطها فى الخلاط ومعاهم لبن متلج وشويه بودره كريم شانتيه ونضربهم فى الخلاط كويس مع كميه السكر اللى محتاجينها ونصبهم فى الكوبايات مع قطعه ثلج
وبالهنا والشفا
https://t0.gstatic.com/images?q=tbn:A…1oXQTX0bJ7mkag
انا كدا خلصت ومش طالبه منكم غير دعوه طيبه بظهر الغيب
ومتنسوش التقييم لانى فعلا تعبت جدا على ماخلصت الموضوع .. يلا شدوا حيلكم واعملوا ومتكسلوش ^_^
انتظرونى فى وصفات جديده بس شجعونى ^_^
مواضيع هذا القسم برعاية
mama nonia mama nonia images/avatars/orangeflower.gif فتكات رائعة Fatakat 803827 مصر – مصر