السلام عليكم
حبيباتى وحشتونى اوى اوى اوى
انا بشكركم جدا لانى استفدت منكم كتير اوى
المهم ياحلوين انا ولدت يوم 15 -4 الحمد لله
انا ياحلوين مكنتش مخططه للحمل ده خالص كنت باخد علاج للمشاكل اللى عملتهالى وسائل منع الحمل المهم الدكتور قالى مفيش تبويض المهم ارتحت على كده وكنت مطمنه ان مش هيحصل حمل وقالى التبويض هيرجع بس بعد فتره المهم فعلا شهر ورا شهر وكله تمام فقلت بدام مبيحصلش حمل يبقى الامور خربانه وايه مش هيحصل حمل واهو مرتاحه من الوسيله معايا يابطابيط واذ فجاه ا الدوره اتخرت قولت يمكن لخبطه عادى يعنى ده اصلا انا معنديش تبويض انا عندى عطل فنى ومحتاجه اروح الصيانه المهم لاقيت نفسى فعلا حامل وبعد بكاء وصريخ وحجات كتير كده لان بنتى لسه صغيره المهم لامفر انا حامل والمكتوب على الجبين
المهم استسلمت للامر الواقع المهم بدات اركز بقى اوى اوى ياترى هجيب ايه واد ولا بنت المهم انا بقى كنت عامله فتكه اوى واثقه فى نفسى وواثقه من احلامى انها متنزلش الارض ابدا وواضح انها هتنزل المره دى متستعجلوش هتعرفوا كل حاجه فى وقتها
اه نسيت اقولكم انا معايا 3 اطفال جبت اول مره بنت وبعدين ولد وبعدين بنت المفاجاه انا بقى جبت ايه المره دى انا بقى كنت عارفه كل مره هجيب واشوف حلم باللى هجيبه وفى باقى حياتى كل احلامى بتتحقق بالنص وحتى لما اشوف حلم لاى حد بيتحققق بحزافيره روحت للدكتوره فقالتلى مشاء اللله انتى ماشيه بنت ولد بنت ولد يبقى انتى فى سطر الولد قولتلها ربنا يسمع منك يالا كده يبقى ربنا كرمنى وهيبقى معايا بنتين وولدين كده تمام لانى اتحرمت من الاخوات وكان نفسى فى عزوه الحمد لله فضلت باستمرار احلم احلام تدل على انى هجيل ولد اول الحمل حلمت ان صدرى بينزل منه لبن ومكتوب على صدرى لفظ الجلاله الله وتفسيره ولد وحلمت كمان ان طلعلى سنه جديده فى الفك العلوى وتفسيره ايضا بان الفك العلوى ذكور وكمان حلمت ان كنت مكحله عين واحده وعايا قلم كحل وزوجى اشترى لى قلم كحل اخر كحلت به العين الثانيه وكمان حلمت بان زوجى اعطانى علبه بها صابوه اسود وابنى محمد اللى كان شايل العلبه اقولك ايه ولا ايه واحلام كتير كتير معظم تفسيرها بالولد المهم اروح للدكتوره تقولى ايه بنت اقولها بجد تقولى والله بنت واضحه اقوم انا اصدقها لا طبعا والله ماصدقت طبعا ولا اقتنعت روحت لدكتور تانى وقالى بنت اصدق لا طبعا ده انا احلامى مجربه ومبتنزلش الارض ابدا واضح ان حنفى بهت عليا ماعلينا
روحت لدكتور تالت قال ايه بنت برضوا واضح ان فيه اجماع على كده بس خليكوا فاكرين ان انتوا اللى اجمعتوا مش انا
ابص فى المرايا اشوف ايه اشوف بدل منخيرى بططسايه وباجماع من كل اللى شفونى وبقيت وحشه اوى جوزى بقى احلى منى وكمان بطنى كانت صغنونه وكمان ايه بتوحم على الحادق شوف ازاى المهم مفيش حاجه فى حمل الصبيان الا وكانت عندى
فضلت واثقه فى نفسى واقول ايه انا متاكده من احساسى واحلامى فضلت اقول انا باكينام وانا واثقه فى نفسى الجميع كان مقتنع ان هجيب ولد وبكذب وبقول هجيب بنت وانا كمان كنت مقتنعه ان هجيب ولد بس كل حاجه بتقول ان هجيب ولد الا حاجه واحده السونار يبقول بنت ناخد بكلامه يعنى واسيب احساسى واحلامى اللى مبيكدبوش ابدا
عدت ايام وايام لحد ماحلمت انى هولد يوم 15 وقولت للجميع انا حلمت انى هولد يوم 15 طبعا كان مستحيل حد يصدقنى لان اخر يوم فى التاسع يوم 28 فين بقى التاريخ ده من ده المهم اجى يوم 15 الاقى نفسى تعبانه ومش مرتاحه وفعلا كانت ولاده روحت وكلى تفاؤل وتحدى للدكتوره وللسونار وبصتله اوى وقولتله تبا لك ايها السونار ياانا ياانت انهرده المهم عينك مااتشوف الا النور ووجع وجع وطلق كان بجد طلق رهيب وفزيع كنت بموت المهم بعد لما اتهديت من وجع الطلق مكنتش بفكر فى حاجه غير انى اخلص وارتاح واروح بيتى لولادى ادخل اولد والمفاجاه بقى بقى مش اى مفاجاه بعد معاناه من نزول الجنين واخيرا ظهر للحياه بعد معاناه وحيره الاقى ايه ؟ حذروا فظروا
جبت بنت والله العظيم بنت.
المهم من هبلى وهطلى مكنش مقتنعه برضوا مش عارفه على اساس ايه هنام اصحى الصبح الصبح الاقى حاجه نبتت للبت ولا ايه المهم انا مكسوفه من نفسى اوى اوى وبقدم اعتذارى واسفى للسيد الفاضل السونار لان فعلا القطنه مبتكذبش على راى ابله نظيره
بس لحد دلوقتى مش فاهمه احلامى دى ايه سببها ولا ليه المره دى احساسى كان غلط بصراحه مش لاقيه اى تفسير يعنى كل الاحلام طلعت غلط الا حلم ميعاد الولاده يالا والله مكسوفه من نفسى اوى اوى
لفلى دودو لفلى دودو فتكات نشيطة Fatakat 1086786 المنصوره – مصر