فتوكاتى الحلوين اسعد الله مساؤكم بكل خير
النهارده انا عملت عشا خفيف لذيذ سريع عملت فطاير وبيتزا بالعجينه الرهيبه عجينه العشر دقائق فعلا نتيجه سريعه وجميله ومفيهاش احتمالات للفشل ابدااا مهما كنتى مش خبيره هتخليكى استاذه
يلا ندخل على المقادير بسم الله
العجن على مرحلتين الاولى
كوبايتين دقيق
معلقتين كبار خميره فوريه
معلقتين سكر
رشه ملح
وحوالى كوبايه ونص مايه او زياده
نعجن المقادير السابقه مع بعض ونخلى قوامهم زى الكيك ونسيبهم يخمروا عشر دقايق زى كده
بعد العجن كده
وكده بعد ماسيبتها عشر دقايق هتلاحظوا انها اختمرت وبدات تظهر فقاقيع
بعد كده ندخل على المرحله التانيه
3 كوبيات دقيق
نص كوبايه زيت
ونخلطهم مع المقادير اللى فاتت ونعجنهم كويس زى كده
طبعا الزيت مش باين اوى نزل تحت وكده لما عجنتها وبقت جاهزه للتشكيل
انا عملت منها بيتزا
اخدت جزى من العجين على مقاس الصينيه بتاعتى بحيث انها لما تتفرد تكون سمك رفيع لانها بتنفش عشان متقلبش كيكه ههههههههههه بعد كده دهنتها صلصه وحطيت الحشو لحم مفروم ومعصج فلفل اخضر مقطع وطماطم مقطعه وزيتون مقطع وبعين رشيت على الوش جبنه حلوم اللى كانت عندى مكانش عندى موتزريلاودخلتها الفرن يادوب عشر دقايق فرن حامى لغايه ما ساحت الجبنه ودى الصور بالترتيب
اللى فى النص دى اضافه ميوره هههههههه كانت مونسانى من اول الشغلواكيد انتو عارفين اللى بيحصل
كنت مقطعه الحواف حركه كده يعنى وانا بحط الجبنه حاولت احط عند كل طرف حته اى نعم مش اتظبطت اوى بس مشى الحال وكانت طعمه
بعد كده تنيت الاطراف
طبعا تدهنى الصينيه بزيت خفيف قبل ما تفردى العجينه وتدخليها الفرن
ودى كده البيتزا لما طلعتها
ندخل على الفطاير والصور واضحه كفايه
بس طولى الشقوق شويه اللى فى طرف العجينه
ممكن الحشو اللى على مزاجك اى حاجه متقولش لا وتلفى بعد كده
ده شكل تانى
وتلفى انا استخدمت جبنه كيرى وحشيت وحدات زعتر شامى اللى هو مع السمسم عجنته بزيت زيتون بيبقى طعمه رهيييب الى جانب فوايده طبعا
قبل الفرن تدهني الوش ببيض مخفوق ولبن وترشى سمسم او حبه البركه على الرف اللى فى الوسط لما تنفش وتستوى من تحت شغلى الشوايه ثوانى الوش يحمر
ده بعد مالفيتهم قبل الفرن
وكده بعد الفرن
يارب تكون عجبتكم واللى يعجبها تدعيلى بالشفا والستر فى الغربه الا الصحه بعافيه شويه وكمان تقيمنى (طماعه صح) طيب خلاص بلاش التقييم بس بالله عليكم متنسونى من دعواتكم الحلوه يااحلى اخوات
والى لقاء اخر دمتم فى حفظ الله مواضيع هذا القسم برعاية
ام لؤلؤ وميوره ام لؤلؤ وميوره 215892_3.gif فتكات ست الكل Fatakat 215892 مملكتى الخاصه – الدنيا الواسعه