السلام عليكم ورحمه الله وبركاته
النهارده انا عملت برطمان التوم بتاع كل شهر او لحد ما يخلص
انا عموما بجيب التوم وافضل اقشر فيه كله واحطه فى اكياس زى الصوره كده واحطه فى الفريزر
زى الصوره دى
بعد كده بطلع منه شويه واحطهم فى الكبه لحد مايفك شويه
وبحط عليه الفلفل الاخضر والاحمر ومعلقه ملح كبيره
واضربهم كويس بس مش يتعصر طبعا
وتقلبيهم فى معلقتين زيت كبار بس بعد الضرب خالص
لانك لو حطيتى الزيت قبل الضرب هتلاقى التوم بقى هريسه خالص
وبيقى مش حلو
وبعد كده حطيه فى برطمان ازاز ولازم برضه تحطى فوقه زيت تانى
زى كده
البرطمان ده بيقعد بالشهر فى بابا التلاجه محتفظ بريحته ونكهته حلو قووووووووى
وبينفع مش كل يوم اققشر توم
نيجى بقى للهريسه
انا كنت كل مره بسلق الفلفل
بس المره دى عملته زى ما نجلاء الشرشابى قالت مش لازم يتسلق خالص
انا كنت بخده غلوه واحده فى شويه مايه صغيرين قوى
ده كيلو فلفل احمر غسلته كويس لو مش عايزها حراقه قووى ممكن تخليه نص كيلو من ده ونص كيلو من الفلفل الاحمر الرومى
وهنا قطعته وشيلت الراس بتاعته
ولازم يتقطع عشان هيتحط فى الخلاط
الصوره الى جايه بقى للاسف طلعت مهزوزه ومش حلوه
انا حطيت الفلفل شويه شويه مع نص كوبايه خل ونص كوبايه زيت او اكتر شويه ومعلقه ملح كبيره ورشه فلفل اسود ولو عندك بوده بصل وبوده توم كمان حلوين ومعلقه سكر كبيره وحوالى راس توم مفصص وضفت برضه معلقتين صلصله طماطم بس دى اختيارى برضه
بس الفلفل بلاش تحطى الكيلو كله مره واحده عشان الخلاط يدور
هنا بعد ما الضرب وللاسف كنت تقريبا قربت اخلص تفضيته فى البرطمانات
عشان الصور الى قبل كده للاسف طلعت مهزوزه قووووى
ودى كمان مش حلوه للاسف لان الصوره فاتحه هو لونه احمر مش عارفه ايه اللون ده
وهنا بقى فى البرطمانات
وبرضه لازم تحطى على الوش زيت
عشان يحفظه ويقعد فتره طويله ومش بيحصله حاجه
برضه بيتحط فى بابا التلاجه
بس انا كده خلصت يارب تكونوا استفدتوا من الموضوع
انا بحب الهريسه دى وبضيفها على معظم الاكل بتبقى حلوه قوووى للى بيحب الاكل مشطشط هتعجبه قوووى
وياريت الى يعجبها الموضوع تتدعيلى دعوه حلوه
ومتنسوش التقيييييييييم يابنات
مواضيع هذا القسم برعاية
ام رودى العسل ام رودى العسل 258244_26.gif ملكة فتكات Fatakat 258244 مدينه الحب – مصر ام الدنيا