بسم الله الرحمن الرحيم
ازيكو يا فتكاتى يا حلوييين
انا النهاردة جيبالكو اكلتين سريعة كدا لخطيبى الى بيجيلى فجاءة كدا وابص الاقيه اتصل انا جاى فى الطريق وراجع طبعا من الشغل ولازم يتغدا ولازم طبعا بسرعة جدااااااااااااااااقولت بقى لازم انزلهم وحبايبى فتكاتى يشوفهم
يلا عشان مطولش عليكو واسيب اللاب توب لماما عشان عضويتها هى عقبال ماتجوز واعمل عضوية وانزلكو من بيتى من قلب الحدث يارب
صور الاكلة الاولى
( بيكاتا بالمشروم – تشكن تندر – رز بالبهارت – ميكس سلطة – بطاطس محمرة )
الطريقه :- وسورى بقى مش بلحق اصور الطرق عشان الحق اخلص بسرعة
البيكاتا :- هو المفروض نص صدور بس انا استخدمت الفرخة عشان كنا 5 افراد خليت منها للبيكاتا والباقى منها الاجنحة والرقبة وباقى الوراك عملت منهم تشكن تندر
( الصدور- مشروم – زبدة -كريمة لبانى -معلقتين دقيق – بصل – فلفل اخضر – (بهارات فراخ- فلفل اسمر وابيض وسماق وملح )
هنجيب طاسة نحط الزبدة وننزل بالصدور عليها وتقلبها على الجمبين ومنسبهاش تنشف تاخد صدمات لانها بتستوى بسرعة وبعدين ننشلها
وفى نفس الطاسة نقطع البصل والفلفل شرايح ونشوحهم فيها وبعدين نضيف المشروم والبهارات كلها ونقلبهم تقلبتين وبعدين نضيف الدقيق ونقلب ونزل الصدور والكريمة اللبانى ونقلب وبعدين نطلعها على سرفيس ونزينها ببقدونس زى كدا
التشكن تندر :- الى اتبقى من الفرخة نسيبهم فى شوية مياه بخل على ما نعمل الصوص بتاعهم
الصوص ( علبة زبادى – معلقتين مستردة – معلقتين كاتشب – صوص حار شطة – بهارات فراخ – قرنفل – قرفة – سماق – جنزبيل – ملح – شطة – فلفل اسمر – زعتر مجفف -معلقة زيت- معلقة خل _ ليمونة )
علبة بلاستيك وحطى كل مقاديرة فيها وقلبيهم وهاتى الفراخ من المياه وحطيهم فى العلبة وغطى ورجى فيها اوووى لحد ما الفراخ تاخد الصوص كله
وصنيه وادهنيها معلقة زيت ورصيى الفراخ فيها مع رشة زيت من فوق وتكونى مسخنة الفرن قبلها وتتطلع وقدميها مع بطاطس محمرة تجنننن هى طبيعتها بتبقى حرااااااااقة جداااااا لو مش حبة ممكن تلغى الشطة وصورتها اهى
رز بالبهارات :- ( رز بسمتى – بهارات فراخ – كمون – كسبرة ناشفة – ملح- زبدة – ورق لورى – حبهان مطحون- قرفة )
فى الحلة الزبدة وبعدين كل البهارات ماعادا الملح وننزل بالرز ونشوح شوية وبعدين المياه والملح
طبق المفضل بقى ميكس السلطة :- فلفل الوان – خيار – كابتشى – بقدونس – زيتون اسمر – عيش شامى محمص – جبنة رومى مبشور – زيت زيتون – ذرة
هتقطعى كل الخضار مكعبات كبيرة وتضيفى عليهم الذرةوالزيتون ورشة ملح خفيفة جدا عشان الزيتون بيحدقها وبعدين رشة زيت زيتون وقلبيهم تكونى قطعتى العيش الشامى الطخين بلاش الرفيع بيتحرق ومش بالطعم دا واقليه فى الزيت وتضفيه على الوش وبعدين الرومى المبشور وانا عشان بحب العيش دا اوووى حمصت شوية والباقى عملت طبق تانى جمبهم لوحده
الاكلة التانية
للاسف النور قطع عليا وانا بعمله وعملت على كشاف وبرده مفقدتش الامل صورته برده
صورة لاكل
(باستا بالمشروووم – كفتة مشوية – كول سلو – بطاطس محمرة )
طريقة الباستا :- كيس مكرونة اقلام- مشروم- كريمة لبانى -2 معلقة بشاميل – كوب لبن – كريمة لبانى – فلفل الوان مقطع مكعبات صغيرة – معلقة سمنة -ملح – فلفل اسمر – رومى مبشور
هنسلق المكرونة وبعدين معلقة السمنة وننزل بالمشروم ونشوحه وبعدين المكرونة والفلفل المتقطع
الصوص بتاعها كوب لبن على معلقتين بشاميل جاهز ونقلب لحد ما يتماسك ويتقل شوية ونضيف للمكرونة وعليه الكريمة اللبانى وشوية رومى مبشور
الكفتة المشوية :- ربع لحمة مفرومة -بصلة متوسطة مبشورة -بقدونس مفروم -دهن مفروم بهارات كفتة وملح وفلفل اسمر- شطة
هنقلب كل دا على اللحمة بس ياريت مش فى الكبة على الايد كدا ونصبعهم على اسياخ الخشب ونجيب صنية حروفها عاليةونرص الاسياخ علي حروفها من فوق وندخلها الفرن ونكون مسخنين الفرن قبليها بنص ساعة على الاقل على ما نعمل الصوص بتاعها
الصوص :-فلفل الوان شرايح – بصلة شرايح معلقة زبدة معلقتين كاتشب وبهارات كفتة وملح وفلفل اسمر فى طاسة هنحطهم ونشوحهم واول ما الكفتة تتطلع ترصيها فوقيهم وتكون مسخنة فحماية وتحطيها فى الطاسة وتغطى تاخد طعم الفحم وقدميها هتلاقى صوتها عمالة تعمل تشششششش صورة للصوص
الكول سلو :- كرنبة متوسطة مبشورة ناعم – جزرتين مبشورين ناعم – علبة زبادى – معلقتين مايونيز – 4 معلاق سكر – رشة ملح كل دا على بعضه وفى علبة وعلى الفريز عشان تلحق تاخد الطعم بسرعة
انا كدا خلصت وتعبت فى التصوير فى الضلمةو رفع الصور تقييييييمكم بقى عشان اشوف هنفع ولا لا ودعوة حلوة منكوا ربنا يصلحلى حالى انا وخطيبى ويوسع رزقه ويجمعنا على خييير يارب
مواضيع هذا القسم برعاية
فرحه نونه فرحه نونه فتكات متميزة Fatakat 440834 الغربية – مصر