السلام عليكم ورحمة الله وبركاته
اززيكم يا فتوكاتي وعاملين ايه في البرد الفظييع ؟؟
النهارده هقولكم علي فوكيره جميله ومريحه هي اكتشاف بمعني اصح
لان كلنا بنبحث عن الراحه والنظافه والعنايه
وخصوصا في الايام العصيبه اللي بيبقي فيها افرازات وحاجات مش مريحه كده
ندخل في الموضوع
الادوات اللي هنستخدمها
1- شايفين الفوط دي
دي عباره عن فوط تنظيف النظارات
هنختار النوع القطني منها
2- باسكت سياره " انا لقيت واحد قديم عندي"
او ممكن تستخدمي اي بديل
وتحطيه جامب باسكيت الحمام العادي
هنعمل بيه ايه بقي
ليها استخدامات كتيره في العنايه النسائيه
1- في ايام بيبقي فيها افرازات مثل ايام الالتهابات او بعض فترات من الحمل
هتعملي ايه
هتحطي الفوطه دي وكل ماتدخلي الحمام وتلاقيها فيها افرازات هترميها
هترميها فين ؟
مش في الزباله
لا هترميها في الباسكت الصغنن ده
هيتجمع طبعا معاكي كتير
كل ما تشغلي الغساله ترميهم فيها وخلاص
هينضفوا ويتعقموا
ويا سلام كمان لو كويتيهم بعد ما تشيلي من علي الحبل
يبقي تعقيم جيد جدا
طبعا كده دايما هتبقي ناشفه ونضيفه ومفيش اي روائح او افرازات ماسكه فيكي كتير
طيب ليها استخدام تاني ؟؟
اه
2- في التنشيف بعد التواليت
كلنا بنسمع ان الاحسن ننشف بحاجه واحده وتترمي
وكمان المناديل بتفرول ومش كلنا بنحبها
يبقي تحطي شوية فوط من دي في الحمام
وكل ماتدخلي الحمام تنشفي بواحده جديده وترميها في الباسكيت
3- في اخر ايام البريود بيبقي فيه نقط بس كده
ومش بنبقي طايقين الفوطه الصحيه
فاممكن جدا نحط من الفوط دي وبرضو نغيرها علي طول
4- فيه بنات بيحبوا يحطوا حاجه علي الاندر وهما خارجين
وسمعنا ان المناديل الورق بتفرول وبتتجمع جوه المهبل
تبقي الفوط دي حلوه اوي في الاستخدام ده
وبتحطيها في شنطتك وتغيري في اي مكان
5- في ايام التلج اللي احنا فيها دي
ساعات بنكون عاوزين نشطف جسمنا ومش قادرين نقلع كل هدومنا من السقعه
هتعملي ايه
هتاخدي فوطه وتبليها بمايه سخنه من الحنفيه وتعصريها كويس
ورشتين برفان عليها
وتمسحي الاماكن اللي فيها عرق زي تحت الابط
او تحت الصدر او بين الرجلين
6- ممكن كمان نستخدمها بنفس الطريقه في ازالة المكياج
ولو اي فتوكه عجبتها الفكره ولاقيت ليها استخدامات تانيه ممكن تقولنا عليها
طيب هنجيبها منين ؟؟
انا عن نفسي جوزي بيجيبها من وسط البلد من بتوع النظارات الجمله
عشان دي شغلتنا اصلا
بيجيب العلبه فيها حوالي 50 او 100 مش فاكره
بتلاته جنيه ونص
انتي ممكن تروحي لعمو بتاع النظارات اللي جمبك وتشتري منه علبه
ولو مش عنده وصيه عليها وهيجبهالك تاني يوم
بس قوليله القطن اللي هي سوري رديئه بالنسبه للست نظاره " الافضل ليها الميكروفيبر"
لكن احنا عاوزين القطن
عشان كده رخيصه
هو طبعا مش هيديهالك بتلاته جنيه ونص لان ده تمن جملتها اكيد هيكسب
مفيش مشكله برضو مازالت رخيصه
وشوفي العلبه اللي فيها 100 هتقعد معاكي قد ايه
اخر حاجه عشان طولت عليكم
لحقوق الملكيه الفكريه الاختراع ده من حمااااااااتي
لانها كانت عايشه في ايطاليا وهناك بيستخدموا علي طول فوط نسائيه رقيقه كده زي المناديل
مش بيستغنوا عنها
ومش عارفه هي هنا بتتاع فين وغاليه ولا لا
ففوط النظارات دي بديل جيد ليها
لو عجبتكم الفكره في انتظار ردودكم وتجاربكم ومتنسوش التقييم
vet dodo vet dodo 486384_4.gif سوبر فتكات Fatakat 486384 القاهره – مصر