طبعا ناس كتير هتعارضنى فى اللى هقوله دا بس انا حبيت افضفض و اشوف كدا انا اللى بفكر كدا بس ولا فيه حد زيي
انا شايفة ان بيت العروسة فى مصر عبارة عن معرض للمنظره مش بيت للعيشة
يعنى مثلا "مفرش السرير " المنفوش الدوشه دا نفسسسسسسسسى القيله اى لازمة او استخدام عملى غير ان العروسه تفضل تشيل و تحط عشان الناس تقول دى جايبه مفرش شكلوا كذا و لونه كذا !! :@
الصنم المسمى "بالنيش" حاجة سلبية لا اجابه لها و معظم العرايس دلوقتى بيجيبوه غصب عشان اهلهم شايفين ان الناس هتاكل وشهم, ازاى بنتهم معندهاش نيش !!! اصل لازم يبقى عندك حاجات شيك تقدمى فيها للضيوف و حاجات عاديه فى المطبخ لاستخدامك !! ليه ان شاء الله هو انا مليش نفس اكل فى حاجات شيك و لا انا عامله شقتى للضيوف و طظ فيا مثلا !! هيطلع حد يقولى عشان الحاجات اللى فى المطبخ بتكسر لازم تبقى رخيصة !! طب هو يعنى حاجات النيش دى مش هتكسر !! دا الواحدة بتبقى مرعوبه تفتحه لحاجة تقع مش هنضحك على نفسنا الغرض الخفى للنيش هو المنظره ادام الناس و الغرض الظاهر ان الحاجات فى المطبخ هتكسر
غير طبعا طبعا العادات المختلفة لكل منطقة بالاعداد المستفزة للملايات مثلا اللى تقولك اقل حاجة 40 ملاية 50 لانجرى و غيرها من الارقام الفلكية اللى منقدرش نقول عليها الا " منظره كدابة "
يا ستى عايزة بيتك شيك و شكله حلو هاتى حاجات شيك بس ليها استخدام يعنى بدل المفرش دا ممكن لو فى الشتا تجيبى كوفرته او لحاف شكله حلو و هيبقى ارخص من المفرش دا بكتير او لو حتى اغلى على الاقل ليه استخدام مش هيتحط لما الضيوف يجوا بس
و النيش دا انا مش هقول حله ايه عشان الحاجات اللى فيه اصلا محدش بيستخدمها يعنى لو جبتى طقم اركوبال او اركوبيرس او حتى صينى عدد صغير و حتطيه فى الطبخ مع طقم عشا شكله شيك مش هيقول لا و لو مطبخك صغير نجيب النيش بس نحط فيه حاجات نستخدمها مش حاجات مخصصة للضيوف فقط و باقى الايام ممنوع الاقتراب او التصوير
فى النهايه انا شايفه ان فى تقاليد و عادات كتير اوى فى الجواز عندنا محتاجة تتغير بس للاسف الجيل اللى قبلنا مش راضى يغير تفكيره دا و بيفرضوا عليا ساعات غصب و اقتدار نفسى بجد تفكيرنا المعتمد على المظاهر دا يتغير
amiralovem amiralovem 1099927_2.gif فتكات متميزة Fatakat 1099927 الجيزة – مصر