دي اول مرة اكتب فيها في قسم المطبخ وعمري ماتخيلت اني هكتب في القسم ده بصراحة
انا اولا احب اوجه شكري لكل بنت في قسم المطبخ خدت من وقتها ونفعتنا بحاجة هي عملتها والله في بنات كتير بيبقوا ملهمش في المطبخ اوي وبيستفيدوا منكم جدا وانا كنت واحدة من الناس دول
اتجوزت وانا مليش اي علاقة بالمطبخ بس دلوقتي بقالي سنتين متجوزة والبركة في فتكات خلتني اتجرأ وبقيت بحب ابتكر وبعمل حاجات حلوة كتيييير
المهم انا اللي شجعني احط وصفتي اني ملقتهاش هنا قبل كدة .يعني في وصفات بتتكرر كتير زي المحشي والشاورما والفراخ المشوية فلما كنت بعمل الوصفة طقت في دماغي انزلهالكوا
اخر حاجة بقى في الرغي ده كله بعتذرلكوا لو الصور التحضرية مش كتير بس عشان زي ماقلتلكوا مجاش في دماغي اصور غير في الاخر كنت قربت اخلص
نسمــــى الــلــه ونبتـــدي
الوصفة عبارة عن لحم بالبصل والبطاطس
2/1 ك لحمة – 3 بصلات – 3 بطاطس – ملح -فلفل اسود -بهارات – كبيبة صيني (اذا توفرت) – معلقة ص سكر
هتقطعي اللحم قطع صغيرة قد شرايح الكبدة كدة رشي عليهم رشة فلفل اسود وعصرة ليمون قطعي البصل مكعبات صغيرة وشوحيهم في معلقتين سمنة ولما يدبلوا حطي معلقة السكر (بتساعد في سوى اللحمة) وننزل باللحمة بتاعتنا على النار تتشوح مع البصل شوية ونحط التوابل والفلفل الاسود ماعدا الملح
وكل ماللحمة تشرب مايتها ضفيلها ماية تاني بس تكون مياه سخنة غلياها من قبل كدة عشان تستوى معاكي علطول
ده شكل اللحمة وهي خلاص استوت خالص وضفتلها الملح
بس متنشفيش اللحمة ع الاخر شايفين سايبة فيها الصوص بتاعها
تقفلي ع اللحمة وتجيبي البطاطس تقطعيها مكعبات زي كدة
وجبت بصلاية صغيرة متقطعة شرايح مع معلقة زيت ذرة شوحت فيهم البصلة ونزلت بالبطاطس
شوحت البطاطس بالبصل 5 دقايق ونزلت ب2/1 كوباية مايه وغطتيهم
بس خدوا بالكم ان البطاطس متتهريش منكوا يا قمرات تحافظوا على شكل المكعبات .. اوكش
بعد مالبطاطس تشرب مايتها تضيفيها ع اللحمة وتقلبيهم مع بعض شوية على نار هادية عشان البطاطس تشرب من طعم الصوص بتاع اللحمة
ملحوظة صغيرة ابقي زودي الملح سنة بسيطة في اللحمة عشان لما تضيفي البطاطس متبقاش عدمة
وعملت معاها رز ابيض
وده شكل الطبق النهائي
ياريت تجربوها وتقولولي رأيكوا بجد طعمة اوي وتنفع للناس اللي مش بتحب اللحمة طبيخ
ياريت لو اكلتي عجبتكوا تشجعوني في اول مشاركة ليا وتقيموه عشان تعبت اوي في كتابته ورفع الصور
وابني الصغير قالب الشقة فوق دماغي وعمال يشد في الكيبورد وانا بكتب
وياريت دعوة بظهر الغيب منكوا بصلاح الحال وسعة الرزق
ربنا يخليكوا ليا ويكرمكوا
مواضيع هذا القسم برعاية
manola2016 manola2016 502057_5.gif فتكات رائعة Fatakat 502057 الجيزة – مصر