فعلااااا اللي يخاف من العفريت يطلعله
ياجماعه المثل ده بجد حقيقي بس مشكلتي ان العفريت بتاعي من أقذر مخلوقات الله
انا بجد بعاني من المشكله دي من صغري ونفسيتي تعبت بجد من الكائن البشع ده
لدرجه اني لما بشوفه جسمي بيتلبش في بعضه وبترعش جامد وبحس انه زي ما يكون ماشي علي جسمي وساعتها بجد بيجيلي صدمه لدرجه اني مش بقدر اجري او امشي من مكاني مع اني ببقي واقفه في بؤره الخطر وهوه بيبقي واقفلي زي ما يكون بيبصلي بنظره انتصار واعجاب ولسان حاله بيقول
(يوضع سره في اضعف خلقه) قصدي في أقذر خلقه
الموضوع ياجماعه اتطور معايا لدرجه انهم بقوا يجيولي في الحلم(اه والله العظيم لسه حالمه بيهم امبارح) وده بسبب اني شفت واحد امبارح قبل ما انام طبعا كالعاده اتسمرت في مكاني ماما قالتلي فيه ايه مالك يابنتي شوفتي عفريت ولا ايه شاورتلها بصباعي عليه والغريب ان ماما بصتلي بنظره زي ما يكون بتقول مالها الهبله دي وراحت بكل شجاعه مموتاه ونقلته الي مثواه الاخير في قعر الزباله مهوه ده مقامه لا مؤاخذه.
طبعا انا مسكتش علي اللي انا فيه ده قعدت ابحث علي النت ادور علي علاج للمشكله دي لقيت ان فيه مليارات زيي بيترعبوا من المخلوق ده
ومن أظرف الحلول اللي لقيتها لعلاج فوبيا الصراصير واللي خلتني مت علي نفسي من الضحك وقلت اكيد الدكتور ده بيهزر او بيستظرف
انا هنقله وهسيب التعليقات ليكوا
علاج الفوبيا
يوجد طريقتين متناقضتين لعلاج الفوبيا وهما:
1- طريقةالغمربمعنى ان تضع الشخص الخائف من الصراصير مع عدد من الصراصير في حجره بمفرده. طبعا هيصرخ ويتشنج ، بس بعد ذلك سيغلب على مخاوفه وتصبح شيىء عادي.
2- طريقة التدريجيهاي تبدأ بتقديم مثير الخوف على مراحل وفي عده جلسات
منها تقديم مجرد صوره للصرصار في كتاب، وبعد ان يعتادها المريض في الجلسه الثانيه يكون مثلا الصرصار على بعد 10 متر منه
والجلسه الثالثه على بعد مترين وهكذا
مع تهدئه المريض دائما وتفهم مخاوفه.
وده كان احد الردود علي أراء الدكتور الرائعه(طريقه الغمر والتدريج) في زياده فوبيا الصراصير عند البشر مش علاجها طبعاً
فى المشمش!
و الحمد لله المشمش ما بيتزرعش هنا فى شمال كندا.
بصراحة أنا بترعب من الصراصير و ده واحد من الأسباب اللى مخليانى مبسوط هنا حتى ولو درجة الحرارة بتحصل ناقص50 مئوية!
يعنى أنا شفت دب مرة و ما خفتش. إتصرفت زى الكتاب ما بيقول و راح لحاله و سابني فى حالى. و التعابين و التماسيح و حتي العفاريت ما يخوفونيش.
إلا الصراصير!
و متشكر قوى .. مش عايز علاج.. حاعيش و أموت بالمرض بتاعى.
هههههههههههه عندك حق يبني والله)
ودي قصه (جسمي كله قشعر لما قريتها)حصلت لأحد الأطباء في مستشفي الدمرداش
وأنا فى فترة الامتياز كنت سهران فى الطوارئ وجالى واحد من عساكر الأمن المركزىالصعايدة الغلابه اللى بيصعبوا على الواحد من قسوة ظروفهم المعيشيّة فىمعسكراتهم…جه امتى بقى….الساعة 2 الفجر.. وكان بيشتكى من ألم شديد و "زنّه " متقطّعة فى أحد أذنيه…وكانت المفاجئة المذهلة لمّا بصّيت على ودنه…لقيت صرصارصاحى دخل ودنه وهوّه نايم فى المعسكر واتزنق جوّه ومش عارف يطلع وعمّال يعافر جوّهودنه……طبعا كان الحل الوحيد قدّامى هوّه التصرّف بالتفكير التلقائى لأننامادرسناش الحقيقه نعمل ايه لمّا يكون فيه صرصار فى الودن…فقمت بسكب داخل الأذنبعض من مخدّر الزايلوكين السائل الذى نستخدمه فى الحقن الموضعى عند خياطةالجروح…وانتظرت بضعة دقائق حتّى خارت قوى الصرصار فقمت بسحبّه من أذن المريضبماسك الخيوط (أو تقدر تقول كده قمت بانتشال الصرصار من أذن المريض كما يتم انتشالقطّه من بالوعة)الغريب انّى ثانى يوم لمّا بأحكى القصّة لبعض المدرّسنالمساعدين من باب التندّر و الاتيان بقصّة تفوق الخيال لقيتهم بيقولوا لى : "ييييييه….دى بتحصل على طول…انت بس اللى جديد على نوبتجيّات الحوادث فىالدمرداش "
لا تعلللللللللللليييييييييق!!!!!!!!!!!!!
قولولي يافتوكات ايه الحل في الموضوع ده علشان انا بجد اعصابي تعبت من الكائن المقرف ده
وهل اللي انا فيه ده طبيعي ؟! فيه حد هنا بيترعب منهم زيي كده؟!
انا بجد مشاعري تجاههم خليط من القرف والكره والرعب
يارب نفسي يختفوا من حياتي الي أجل غير مسمي!!!!!
رحله المشتاقه رحله المشتاقه 328106_5.gif فتكات ست الكل Fatakat 328106 مدينه البواســ(بورسعيد)ـــــــــل والشجعان – مصر