ازاي كل الفتوكات الحلويين
انهارده جايبالكوا طريقة السوشي معتبره و من موقع اجنبي و اسهل طريقه ممكن تلاقيها لتوفر مقاديرها اكتر من الطرق التانيه
أنا اكتشفت انه سهل جدا و مفهوش اي تعقيد, كلفني بس 80 جنيه لل 50 قطعه و هم بيعملوه في المطاعم الياباني ب 400 جنيه و معظمه سوشي خضار كمان
المهم ندخل في الموضوع
أول حاجه هنعمل الرز للسوشي
هنحتاج:
– كوب و نص رز مصري (كوب الشاي الزجاج العادي او تحسبي كوب بالمكيال العادي يعني 240 مل)
– معلقه صغيرة ملح
– 2 معلقه كبيره سكر
– 3 و نص ملعقه خل أبيض (المواقع التانيه بتقول خل الرز لكن لعدم توفره لقيت موقع اجنبي قال المقدار ده من الخل الأبيض)
الطريقه:
– هنخلط الخل و الملح و السكر في طبق صغير غويط بملعقه لحد ما السكر يدوب و نسيبهم على جنب
– هنغسل الرز عادي و نضيفه في حله صغيره و نضيف كوب و نص ماء بنفس الكوب الزجاجي للشاي
– هنعلي النار لحد ما يغلي و نوطي النار لحد ما يشرب المايه بعدين نسيبه يستوي على نار هاديه جدا و تحته صفيحه لمدة 20 دقيقه
– بعد ما يستوي هتلاحظي انه ملزق شويه زي رز السوشي, المهم هتغرفيه بسرعه و هو سخن في طبق كبير غويط و يكون الطبق رطب أو مندي شويه (ممكن تحطي فيه مايه و تدلقيها كدا هيبقى رطب
-الخطوه اللي جايه دي مهمه جدا عشان الرز يتظبط, هتصبي الخليط بتاع الخل على الرز و بسرعه جدا تقلبي من تحت لفوق لحد ما ريحة الخل تطلع كلها و الرز يبرد شويه و كدا يبقى الرز جاهز
مقادير لف السوشي:
-ورق السوشي هتلاقوه في كارفور اسمه قريب من الاندومي و المكرونات
– سلمون مدخن 200 جرام او اي نوع سمك او جمبري انتو عايزينه مقطع بالطول
– خيار مقشر و مقطع بالطول أو أفوكادو
الطريقه: هنحط ورقة السوشي على بورد جافه و نبتدي نرص طبقة رز رفيعه عليها (لما نمسك الرز بادينا لازم تكون مبلوله عشان ميلزقش في ايدك) مع ترك مسافه انش من فوق و من تحت بعدين نرص شريحه سمك و شريحة خيار جنب بعض في نص الرز اللي مفروش عالشريحه
– نلف السوشي زي السويسرول و نقطعها شرائح عرضها تقريبا سم ونص بسكينه مبلوله و حاميه جدا
– في طريقه تاني لشكل السوشي اننا نكور شوية رز في ايدينا و نحط عليها شريحة سمك أو جمبري و نلف حولهم شريحه رفيعه من ورق السوشي
و مننساش نقدم الصويا صوص الغير مملح جنبه
الصور اللي فاتت للتوضيح و الصورة الأخيره دي هي تطبيقي الأول النهارده
يارب يكون موضوعي عجبكم و وفر عليكوا تمن اكلة سوشي نعيط عليها باقيت الشهر
ولو عجبكوا الموضوع ارجوكم قيموني مواضيع هذا القسم برعاية
mariouma-88 mariouma-88 images/avatars/abstract3.gif فتكات حبوبة Fatakat 593916 Cairo – Egypt