ياريت تقيموا الموضوع علشان يتثبت وبنات كتير تستفيد منه
اولا بشكر اختى((اوراق الخريف)) نودى
لان دى طريقه دكتورها فى تثبيت الوزن
جت لها فترة ما كانتش قادرة تكمل فى الرجيم وفيه مناسبات ولا مفر من العك
فالدكتور اداها التثبيت ده وفعلا مشت عليه..ووزنها فضل ثابت..وممكن ترجعى بعده للرجيم لو لسه فاضل لك وزن عايزة تنزليه
لو وصلتى للمثالى امشى عليه وخلى بالك من الملاحظات وخليها اسلوب حياتك..مش حتتخنى ولا جرام
((ده تعمليه علطول اول ما توصلى للمثالى..او خلاص عايزة اجازة من الرجيم..استراحه محارب يعنى))
اولا فيه رجيم لمده اسبوعين..حتعملى الاول((التمهيدى))..وبعده الثانى ده حيكون نظامك اللى حتمشى عليه((يعنى الاسبوع الثانى))هو ده اكلك علطول للمحافظه على وزنك..ومهم قوى الملاحظات اللى بعده
الاسبوع الاول..((تمهيدى)
الافطار..
ربع رغيف بلدى+اى شىء ممنوع((جبن رومى..طعمييايه.فول بطحينه..المهم المقدار)) قد الطعميايه فقط+شاى بلبن..وممكن اضافه سلطة
بعد ساعتين..
2 ثمرة فاكهة نفس النوع
الغداء..
ربع رغيف او 3 معالق ارز+ وجبه ممنوعه((بانيه..سمك مقلى..او خلى البروتين مشوى او مسلوق وتاكلى النشويات محشى.مكرونه بالبشاميل.وتراعى الكميه القليله .))
العشاء..
2 ثمرة فاكهة نفس النوع((او سلطه خضار))+ زبادى او شاى بلبن
الاسبوع الثانى..
الافطار
نصف رغيف بلدى+وجبه ممنوعه+خضار+شاى بلبن
بعد ساعتين
2 ثمرة فاكهه نوع واحد
الغداء..
نصف رغيف او 5 معالق ارز+ وجبه ممنوعه((بانيه..سمك مقلى..او خلى البروتين مشوى او مسلوق وتاكلى النشويات محشى.مكرونه بالبشاميل.وتراعى الكميه القليله .))
العشاء..
2 ثمرة فاكهة نفس النوع((او سلطه خضار))+ زبادى او شاى بلبن
ملاحظات
مهمه ..مهمه..مهمه..مش حينفع التثبيت من غيرها
1) اوعى تغيرى العشاء..هو ده عشاكى دائما((سلطه خضار او 2 ثمرة فاكهة+شاى بلبن او زبادى))
ولازم قبل الساعه 9 مساء((طبعا رمضان حيختلف)) حسأل نودى عنه واقولكم))
2)لازم حاجة ممنوعه فى الافطار والغداء..لازم جسمك ياخد على الممنوعات((هههههه فى الاكل..مخكم ما يروحش بعيد))يعنى حاجة مقليه..حته حلويات بحجم علبه الكبريت((ماتقوليش قليل..هو احنا كنا طايلين؟؟..ههههه))
3) لو يوم زودتى فى العشاء((طبع الطفاسه غلاب))او عكيتى فى يوم..لازم لازم تانى يوم علطول.مش اليوم الثالث ابدا..تعملى رجيم علشان ((تكفرى عن جريمتك..ههههههه)) اى زياده تنزل علطول وما تتحولش لدهون دائمه..وهو يوم باذن الله حيكون كفايه والفيصل هو الميزان..احتجتى يوم كمان..اديها رجيم..علشان ..اى نصف كيلو زياده ما يتحولش لكاااااااااااااام كيلومع التطنيش
4)فى حالة الجوع الشديد((خلاص اكلتى كل مقرر اليوم..اشربى شاى بلبن فى اى وقت..والافضل انه بعد اى اكل بساعتين..حيسد نفسك عن الاكل خالص لمده 3 ساعات على الاقل))
5)مسموح بقطعه حلويات واحده فى الاسبوع((قطعه جاتو مثلا او ما يعادلها من حبيبى الجلاش..ولا البسبوسه……انتوا عارفين اسلحه الدمار الشامل بقى..ههههههه)) ولازم تاكليها قبل المغرب..فى اى وقت..لكن قبل المغرب..هو كده..من غير ليه..ولا اقولك..علشان الجسم يقدر يحرقها قبل ما تنامى..لو قبل النوم..حتتخزن دهون..ونصوت لما نشوف وش الميزان
6) الافطار ما يزيدش ابدا نشوياته عن نصف رغيف بلدى او رغيف الا ربع..ابدا ابدا..او من 5 الى 7 معالق ارز او مكرونه
7)اى مناسبه((كله فتح عنيه ..صح؟؟))كلى براحتك((على الاقل علشان العين والحسد))لكن تانى يوم لازم رجيم..اوعى((بقولها تانى)) اوعى تأجلى لثالث يوم..ممكن كده تاخدى اسبوع رجيم او اكتر علشان تنزلى الزياده..تانى يوم العك علطول رجيم
8)مسموح ب3 معالق صغيرة سكر للمشروبات وزعيها على اليوم((سكر عادى))
9)خلال الاسبوع.ممكن تاخدى قطعه حلوى قد علبه الكبريت( بسبوسه..شيكولاته مكعبين..مثلث بيتزا))..وبرضه راقبى وزنك..اى زياده.؟؟.اتفقنا …جرى على اونكل رجيم
10)ممنوع الاكل بعد الساعه 9..ممكن مشروبات..اعشاب..شاى بلبن..فقط
11)ممنوع فى الوجبه الواحده تجمعى نوعين بروتين..((يعنى لاتأكلى دجاج ولحم..او لحم وبيض..او بيض وجبن..او…او……ضرورى نوع واحد بروتين ))
12)لو عارفة ان غداكى حيكون فيه نشويات كتير((كشرى..محشى..مكرونه بالبشاميل…..)) قللى نشويات الافطار..علشان تعملى توازن فى اليوم..وما تضطريش تعملى تانى يوم رجيم
13)ممنوع تاكلى شىء ملحه كتير وتحلى بعده ببطيخ مثلا((رنجه..ملوحه..مش…..)) لان جسمك حيخزن ماء فيه لمعادلة الملوحه الزائده ..وتصوتى لما تطلعى على الميزان…ابعدى التحليه ساعتين او اكتر.
)13فى التثبيت مش مهم النوع((مقلى..دسم..حلويات………)) المهم الكميه القليله من كل شىء..مكرونه بالباشميل..خدى قد نصف كف ايدك..اتعلمى من الفرنسيين((مافيهمش حد تخين)) بياكلوا كل شىء لكن كميات قليله
مثال ليوم((علشان عارفة مش حنبطل اسئله))
الافطار
نصف رغيف بلدى+قطعه جبن رومى((شريحه ملظلظه او 2 شريحه رفيعه غلبانه)) او طعميايه كبيرة+سلطه +شاى بلبن
بعد ساعتين..
2 ثمرة فاكهه نوع واحد
الغداء..
محشى((بالمعقول..سيبى باقى الحله للعائله))+ بروتين((مشوى او مسلوق فى حاله اكلتى محشى..او ما يشبهه..لكن اكلتى رز او عيش بلدى يبقى تاكلى مقليات..لاننا اتفقنا ان حاجة واحده بس من الممنوع.))+سلطه+4 معالق طبيخ عادى لو موجود
العشاء..
2 ثمرة فاكهة نفس النوع((او سلطه خضار))+ زبادى او شاى بلبن
خلاص؟؟؟؟؟؟؟؟؟؟؟؟؟؟
هو ده اللى فهمته من نودى..اى اسئله عندكم حقولها وارد عليكم
على العموم عنوانى..موضوع الحلم حيبقى حقيقة بالذوق او بالعافيه حتبقى رشيقه..احنا دلوقت فى الجزء 150
وبناكل الاجزاء اكل..بدل ما ناكل ونعك خارج الرجيم..هههههههههههه
ما تجيش واحده تسأل..وتزعل انى اتأخرت فى الرد..لسه حنقل السؤال لنودى ولما ترد عليا او تسأل دكتورها .زابقى انقل لكم الرد…خلاويص؟؟؟؟؟؟؟؟
استودعكم الله الذى لاتضيع ودائعه
ياريت تقيموا الموضوع علشان يتثبت وبنات كتير تستفيد منه..لان مأساتنا مش نزول الوزن فقط..لكن المصيبه الاكبر اننا مش بنقدر نحافظ على الوزن اللى وصلنا له..انا بقالى سنه بحاول اثبت وزنى((خسيت 54 كيلو..وباذن الله يكون نظام نودى هو الناجح معانا كلنا يارب))
حبيبة_امها حبيبة_امها 202418_3.gif ممنوعة من المشاركة Fatakat 202418 البحيرة – مصر