السلام عليكم
ياجماعة انا عايزة واحدة تطمني وتكون مجربة عملية المنظار لازالة كيس دموي على المبيض لأني عندي كيس دموي على المبيض الايمن قطره 4.5 سم والدكتور شك انه يكون كيس دم مش مائي وعشان يتأكد طلب مني تحليل دم (CA 125 ) وطلعت النسبة 99 والدكتور قال دي نسبة عالية جدا لان الطبيعي يكون اقصاه 35 وهو كدا اتاكد انه كيس دموي ولازم يتشال بعملية منظار … انا عايزة اعرف ايه سبب تكون الكيس دا وهل مالوش علاج غير العملية … وهل ممكن يرجع يتكون كيس تاني بعد العملية ( اصل كمان العملية حراءة اوي داخلة في 7000 جنيه ) … وهل بعد ازالة الكيس في علاج تاني بعدها ولا بيحصل حمل بعد كدا عادي … انا متجوزة بقالي 3 شهور وبعد جوازي بشهر ونص رحت اكشف عند دكتور عشان اطمن ان مفيش عندي موانع حمل ولو فيه حاجة اعالجها بدل ما انتظر على الفاضي … فالدكتور كشف بسونار البطن وقال الرحم سليم والمبايض سليمة وماتستعجلوش الحمل وكتب لي فوليك اسيد واسبرين اطفال … وبعدها بشهر جاتلي الدورة عادي في ميعادها لكن تالت يوم حسيت بالم شديد اسفل البطن كنت حتى مش قادرة امشي وكان الالم مسمع على جلدي من برة لدرجة اني رحت الطوارئ الساعة 2 بالليل وكنت مش طايقة الدكتورة تلمس مكان الوجع واديتني حقنة مسكنة وطلبت مني اعمل اشعة على الحوض والبطن فلما عملتها ظهر الكيس على المبيض الايمن … وانا حتى مستغربة لان الدكتور قاللي ان الكيس بياخد وقت في تكوينه لانه بيكون نتيجة تراكمات من دم الدورة مش بينزل ويتجمع لحد مايعمل الكيس … طب ازاي قبلها بشهر ماكانش باين في السونار والدكتور قاللي المبايض سليمة … ياريت اللي عندها تجربة ترد عليا … ولو اضطريت للعملية يكون احسن اعملها مع دكتور نسا ولا دكتور جراحة مناظير ولو حد يعرف دكتور كويس في اسكندرية تقوللي
اسفة على الاطالة بس انا بجد محتارة وخايفة
marwa_new marwa_new فتكات حبوبة Fatakat 30994 اسكندرية – مصر