خلاصة تجاربي في التعامل مع البشر ..
ماتدوريش على صديقة ولا تسعي لصداقة حد .. اللي مكتوب لك ح ييجي لك لوحدك لحد عندك ..
الحاجة للبشر دي لازم نشطبها من حياتنا ومانستناش منهم حاجة أياً كانت ولو بسيطة .. البشر من الآخر زي قلتهم لا بيحلوا ولا بيربطوا ، اطلبي بس من رب العزة وحده بجد مش مجرد كلام ..
أقصى ما عندهم ح يهونوا عليكي بكلمتين دا لو كان حد كويس لكن أغلبهم ح يهونوا عليكي برضه وممكن جداً تلاقي أسرارك دي معروفة لكل البشر ..
في حين ان ربنا وحده انتى ضامنة 100% انه ح يستر عليكي ومش ح يفضحك ، لكن لو حد من البشر حكى عن اللي انتي قلتيه له ح تعرفي منين انه حكى ؟ مش ح تعرفي دي حاجة محتاجة تقوى الله قوي ، وفي نفس الوقت اللى اتحكى له دا ح تتغير نظرته ليكي .. ح يبص لك من بعيد ويقول .. يااه بقى دي بقى اللي عملت كذا وكذا ؟ ولا باين عليها!!! يعني من الآخر صاحبتك دي خليتك عاارية قدام كل الناس وانتي مش عارفه ومش حاسة .. طب ليه من الأول نوجع دماغنا مع البشر ؟!!! ممكن تنتقي شخصية او اتنين بالكتير موثوق فيهم تحكي لهم اللي مضايقك بس طبعاً دا بعد ما تكوني حكيتي لربنا ، وساعتها لو لسه عاوزه تتكلمى كلميهم بس على سبيل الفضفضة مش اكتر لأنهم مش ح يحلوا ولا يربطوا ..
وياريت نعوّد نفسنا على عدم الحاجة للبشر أصلاً إلا للضرورة .. انا باشوف ان كل ما الواحد يبدأ يستغنى عن البشر بالله قلبه بيقوى ويجمد ويبقى أفضل ، وما ننساش ان ابن القيم قال إن مفسدات القلب خمسة منهم .. كثرة الخلطة
لو شلنا الناس من حساباتنا حقيقي وبطلنا نستنى منهم اتصال أو سؤال أو أى حاجة مادية او معنوية من حنان او اهتمام أو حب أو غيره .. لو بطلنا نستنى منهم حاجة ح نرتاح قوى ومش ح نزعل ولا نشيل من حد ، و ح نشغل وقتنا و عمرنا بنفسنا مش باللي حوالينا ..
على فكرة انا مش باتكلم من فراغ انا باتكلم من واقع خبرة معينة ليا في التعامل مع الناس – والنساء بالذات – وبصراحة شفت منهم كل حاجة
لحد امتى ح نفضل نضيّع عمرنا في .. فلانة قالت وعادت وعملت .. وفلان قصد ايه بكلامه وكان عاوز ايه .. والقيل والقال وننشغل بالناس ؟ احنا ما اتخلقناش عشان كدا ( وما خلقت الجن والإنس إلا ليعبدون ) ح نعبد ربنا امتى بقى لما احنا قاعدين مشغولين بغيرنا وبتفسير تصرفاتهم وتبرير أفعالهم وانتظار حاجة معينة منهم لا وكمان مستغرقين في مشاكلنا معاهم وواخدة من وقتنا وطاقتناو عمرنا .. كل دا بيستنزف من عمرنا ووقتنا اللي المفروض أصلاً يضيع لله مش في التفاهات دي …
ونفاجأ ان عمرنا ضاع ولسه ما دقناش لذة القرب من الله ولا ضيّعنا حتى أقل القليل من وقتنا في معرفة خالقنا من أفعاله معانا ..
بالله ……. دا مش عمر ضايع في تفاهات وبجد احنا محتاجين نتبرمج من الأول ؟!!
amira_alzohor amira_alzohor images/flowersavatars/avatar0023.jpg فتكات نشيطة Fatakat 377046 القاهرة – مصر
سبحان الله و بحمده