صباح الخير
انا مش عارفه ابدأ منين
ومش عاوزه احكى قصة حياتى واد ايه تعبت من كتر المنشطات و الحقن مع انى كويسه و جوزى كمان ….
من اشعة صبغه لتلقيح صناعى لبردقوش و طلح النخل وغيرهم
كل شهر يعدى وقبل ميعاد البيرود .. افتح النت و المدونة بتاعنا و اقعد أدور على أعراض الحمل فبل البيرود والحكاوى والأحاسيس اللى كل ست شعرت بها قبل ميعاد الدوره ……….
كل شهر كنت بأحس بيها والله …. دخول التواليت كتيير … النغزات فى الصدر ….. الغثيان… العصبيه وتقلب المزاج والذى منه……. وأكتب واقول يا ستات الحقونى …… ويردو كتر خيرهم ويطمنونى
أقول بس …دى السناره غمزت يا ولاد …….. هيه هابقى أم وأقعد أحلم وأدعى ربنا وأعيط …وأعيط ويطلع ما فيش حاجه وكانت أوهااام
الشهر ده قلت أريح من المنشطات لأن الشهر اللى فات عملت تلقيح صناعى و أخدت 12 حقنه منشط وأتنين تفجيريه …….. يعنى ورمت
والشهر ده قلت أخد بردقوش وأناناس … ولجات لربنا سبحانه وتعالى
ودعيت كتير و استغفرته والحمد لله
لاقيتنى قبل البيرود بكام يوم زكمت … و سخنت شويه …
غثيان و وجع خفيف فى المبايض وصداع جامد … قلت استنى لميعاد الدوره …….. ماجتش فى ميعادها وأنا عندى منتظمه جدا …
أدخل على المواقع و أقلب وأشوف الأعراض ألاقيها بالضبط و الربط
قلت أروح أعمل تحليل …….طلع سالب
أجرى تانى على النت و الاقى ستاااات كتيييييير عملو تحليل و طلع سالب وهم حوامل ………. قلت يمكن أنا منهم .مين يعلم ..ما هو لازم أطلع حاله نادره ..هو فى شىء كده بيجى بالساهل
استنيت ست أيام و أحلام اليقظه شغاله.. والأعراض تزيد لدرجة أنى بقيت أرجع ……… خلاص بقيت حامل و معايا الشهاده……..
وفى الأخر جت البيرود …………وطلع حمل كاذب .
اللى عاوزه اقوله لأى واحده منتظره الحمل … كل شىء بأيد ربنا هو المانع وهو العاطى ………..
والأعراض اللى بنحس بيها دى نفسيه بحته ……… ولا ليها معنى غير انك بتتعذبى ……. من الأفضل انك ما تدوريش على الأعراض لأن كلنا حوامل و مش حوامل بنحس بها …… بس علشان احنا متشوقين ومنتظرين بنركز بزياده ……..
الحل فى رأى أننا نعمل اللى علينا ……. روحى لدكتور و أسعى بس ما تقعديش على أعصابك لأنه فعلا الدنيا مش بتدى محتاج زى ما بيقولو ولأن كل شىء بميعاد و بمقدار بس أحنا اللى مش فاهمين……..
ومش كل ما تحسى بحاجه تجرى على النت وألحقونى يا جماعه أنا عندى وعندى …………. كل ست غير التانيه و فعلا فى ستات مش بيجيلها أعراض ولا وحم الا بعد شهر أو أكتر
ريحى دماغك لأنى جربت كل حاجه و اكتشفت ان الحل مش فى ايد اى حد أو شىء ………..
الحل فى ايد ربنا سبحانه وتعالى……. وأكيد ده أختبار أو حتى واقع …… المهم اننا نتقبله وما نخليهوش عقدة حياتنا …….
Julia2016 Julia2016 589141_1.gif فتكات هايلة Fatakat 589141 القاهرة – مصر