السلام عليكم
أخباركم إيه يا قمرات .. يارب تكونوا فى أحسن حال
الموضوع ده مش منقول دى تجربتى الشخصية
حبيت أفيدكم بخصوص كريم أكارا بردهان لإنى جربته وعجبنى جداً .. أنا صورت لكم العلبتين اللى عندى
هو فيه منه ألوان كتيرة لكن كلها لجميع أنواع الشعر مكوناته طبيعية و ريحته روعة .. الكريم الوحيد اللى نفع شعر بنتى هى شعرها بيهيش وفيه نسبة جفاف بسيطة وجربت لها أنواع كتيرة لغاية ما جربت الكريم ده وعجبنى جداً .. شعرها بقى لامع وطرى ومافيش هيشان.. هو سعره 20 جنيه و عيبه إنه مش متوفر فى كل الأماكن أنا بلاقيه فى الصيدليات الكبيرة وأحياناً بلاقيه عند محلات العطور والزيوت العطرية ومش بلاقيه فى هايبر أو كارفور أو الصيدليات الصغيرة .. لازم تتأكدى إنه مكتوب عليه مصنوع ومعبأ فى الهند زى ما أنا موضحة فى الصور .. هو كريم للتصفيف وينفع كمان حمام كريم لكن أنا ماجربتوش كحمام كريم
صورت العلبتين اللى عندى ..العلبة الموف دى بفيتامين C و E ومجموعة أعشاب هندية ريحتها شيك وفخمة تشبه العطور الفرنسية هى لونها موف لكن الكاميرا طلعت لونها بينك فى الصورة .. والعلبة الحمراء دى بفيتامين C وأعشاب هندية بريحة الفراولة والتوت رووووعة .. هما دول اللونين اللى أنا جربتهم لإنى دايماً بشترى الأحمر علشان بحب جداً ريحة الفراولة والتوت هو فيه منه ألوان كتيرة كلهم تركيبتهم واحدة من الأعشاب الهندية لكن الإختلاف بيكون فى الرائحة والفيتامينات الداخلة فى تركيبه .
و هنا أنا وضحت عبارة صنع ومعبأ فى الهند
وبعدين عايزة أقول حاجة مهمة جداً .. الكريمات والزيوت ومستحضرات الشعر مهما كانت غالية وجودتها عالية مش هتكون كفاية لوحدها
لازم التغذية السليمة الصحية وتجنب الصبغات وكريمات الفرد بقدر الإمكان .. وكمان نصيحة وعن تجربة الحنة الطبيعية رائعة وممتازة لتطويل الشعر ومنع التساقط لكن خللى بالك حنة جلورى وتوجور والأنواع المماثلة بتكون مش طبيعية وداخل فيها مواد كيميائية .. أنا بشترى حنة خمس خمسات أو حنة إيفا بالصبار الإتنين حنة طبيعية وممتازين وأحياناً بشترى من العطار لكن لازم يكون عطار كبير وموثوق فيه لأن فيه أنواع حنة كتيرة بتكون مغشوشة
الحنة الأصلية بيكون لونها أخضر وخالية من الشوائب وريحتها واضحة وقوية .
يارب أكون قدرت أفيدكم يا قمرات
فى أمان الله ورعايته
Princess of Roses Princess of Roses 1226749_1.gif فتكات نشيطة Fatakat 1226749 القاهرة – مصر