ازيكم ياحلوين ياتعبانين ومفيصين
مش متخيله ان خلاص ولدت ومش هدخل القسم ده تانى بجد القسم ده كان بيهون فترة الحمل بتعبها ومللها ربنا يقوم كل واحده بالسلامه يارب
المهم: دى كانت تانى ولاده ليا والولاده الاولى كانت قيصرى بس المره دى قولت للدكتور انى نفسى اولد طبيعى وقاللى خلاص هنصبر ونستنى وفعلا من بداية التاسع وانا بروحله كل اسبوع وقاللى طول ماالامور مستقره هنستنى الطبيعى بس للاسف رغم انى استنيت لاخر التاسع لكن ماجاليش اى وجع ولا اى حاجة تدل على الطبيعى والراس كانت فى الحوض بس عاليه والدكتور قاللى ماينفعش نستنى تانى وحددلى قيصرى يوم 22/12 وطبعا انا والده معاه قبل كده ببنج كلى عشان كده ماسالتوش هولد بكلى ولا نصفى وطبعا لو كان قاللى نصفى عمرى ماكنت هوافق لانى سمعت ناس كتير خوفتنى منه
المهم يوم الولاده جهزت نفسى واتوكلت على الله انا وجوزى وبنتى وماما واختى وروحنا المستشفى قعدت شويه بعدين قالولى لو عاوزة تدخلى الحمام ادخلى دخلت وخرجت قالولى يلا تعالى معانا انا طبعا خوفت واتوترت اوى وبنتى الصغيره مش فاهمه اوى بس عماله تعيط عليا سلمت عليهم وبوستهم ودخلت مع الممرضه قسم العمليات قبل اوضة العمليات فى اوضة تدخلى تغيرى فيها قلعت هدومى ماعدا البرا وبدى كم عشان البرد ومن تحت قلعت كله ولبست روب العمليات وبونيه على شعرى وشبشب كده ودخلت اوضة العمليات طلعت ع السرير ونمت والدكتور جه قاسلى الضغط وركبلى الكالونه فى ايدى ولقيتهم جايبين بيتادين وبيقعدونى يمسحولى ضهرى بقولهم ليه هو انا هولد بنصفى قالولى لاء ده عادى يعنى بنمسح ضهرك وخلاص لانهم لاحظوا انى اتوترت قولت لاء انا مش هولد نصفى ابدا ادونى كلى لقيت الدكتور ادانى حقنه فى دراعى ماحستش بالدنيا ولا حسيت بحقنة الضهر ولا اى حاجة روحت فى سابع نومة صحيت وهما بيطلعوا بنتى من بطنى والدكتور ماسكها من رجلها واتصدمت لانها كانت صغننه اوى رغم انى مكمله التاسع لاخره المهم نصى التحتانى ده ماكنتش حاسه بيه خالص كأنه مش موجود خالص بس كنت حاسه وهما بيضغطوا على بطنى بشده كده وحسيت انى مش قادره اتنفس وعماله اقولهم مش قادره اخد نفسى راح الدكتور حطلى ماسك الاكسجين على وشى الحمد لله اتنفست كويس بس اسوء حاجة ان الوقت كان بطييييييييئ وانا زهقت وبردت وكنت عاوزة اخلص واطلع لاهلى بره وكان فى ساعة على الحيطة كل شويه ابص عليها اشوف الساعه كام وماكانش غايظنى الا الدكاتره عمالين يتكلموا مع بعض فى كلام فارغ وكانهم بيحشوا محشى مش بيخيطوا بطنى
بعد كده خلصوا وجت الممرضه جابت لبسى وقالتلى انا مش هخرجك الا بلبسك كله عشان الجو برد ربنا يكرمها حتى البنطلون لبستهولى ولفتلى دماغى بطرحه وغطتنى بالبطانيه وخرجت كنت بموت من البرد وسنانى بتخبط فى بعض جابولى بطانيه تانى وغطونى ولفيت دماغى بشال صوف ولبسونى شراب وفضلت رجلى مش حاسه بيها يجى ساعتين وعماله اعيط واقولهم عاوزة احرك رجلى مش عارفه وشويه والبنج ابتدى يروح وابتديت اصوت هاتولى مسكن وكل شويه الممرضه تيجى تدينى حقنه فى وركى ارتاح شويه وارجع اعيطلهم تانى هههههه وكانوا معلقيلى محلول خلص علقولى واحد تانى وشويه الممرضه جت وقالتلى حاولى تقومى تتمشى فى الاول ماقدرتش خالص بعدين قومونى قعدت نص قاعده وشويه شويه نزلت رجلى على الارض وابتديت اقوم وهما مسندنى وقومت قعدت على كرسى والممرضه جت وقالت الدكتور قال لو اتمشيتى ممكن تروحى قولتلها طب ادينى حقنة مسكن وانا هقدر اتمشى وفعلا اخدت الحقنه وسندونى اتمشيت كام خطوة وقعدت ريحت لحد ماحضروا حاجتى وسندونى نزلت فى الاسانسير وركبت العربيه وروحت عند ماما طبعا اول كام يوم كانوا تعب من كله جالى صداع نصفى بسبب البنج وماكنش بيضيع بالمسكنات وبنتى جالها الصفره وماكنتش بنام بس الحمد لله عدت على خير
الخلاصة انى من خلال تجربتى البنج الكلى كان افضل بالنسبه ليا النصفى جابلى صداع ووجع فى الضهر ولحد دلوقت فى جزء فى وركى منمل ومش حاسه بيه ورجلى بتوجعنى اوقات وتشد عليا الحمد لله
ادعولى بقى ربنا يباركلى فى بناتى (مريم ومرام)ويفرحنى بيهم ويرزقنى باخ ليهم المره الجايه ان شاء الله بقى
ضاضا ضاضا 111685_4.gif سوبر فتكات Fatakat 111685 قلب بدر حبيبى وزوج المستقبل بس ادعولى-الجيزة – مصر
سبحان الله و بحمده