ازيكم يا اجمل فتوكات
فى اجمل مدونة
اتمنى تكونوا كلكم بالف خير وصحة وسعادة
النهارده هقولكم على طريقة عيش التورتيلا اللى بعملها على طول
واتعلمتها من مدونة تانى من زمان وبقت هى الطريقة المعتمدة الحمد لله
وانتم عارفين طبعا عيش التورتيلا ده عشان الساندوتشات بالأخص الشاورما
ويا سلام بقى لما تعمليه بنفسك ويبقى طازة وانتى بتعملى الشاورما
بيبقى رووووووووووعة وطريقته سهلة خالص
إن شاء الله يعجبكم
نبدأ بسم الله
المقادير
2 كوب دقيق
ذرة ملح
معلقة خميرة فورية كبيرة
معلقة كبيرة سكر
2 معلقة كبيرة حليب بودرة
25 مل زيت او زبدة سايحة (فى حدود معلقتين كبار الا شوية)
و ممكن تحطوا للنكهة ثوم بودرة او زعتر او روز مارى او كارى
المرة دى هعمله من غير نكهة عادى خالص
الطريقة
(معلش نسيت اصور اول الخطوات بس ها تلاقوها سهلة خالص)
1- بحط كل المقادير الجافة مع بعض واقلبها كويس بمعلقة خشب او بالعجان
2- اضيف الزيت والمياه شوية شوية واقلب كويس واعجنها كويس اوى
3- بسيبها تخمر من نصف ساعة لساعة فى طبق غويط متغطى بفوطة ناشفة
4- لما تختمر العجينة اقسمها لعشر كور وارفد كل كرة
معلش دول 5 كور بس عشان كنت فردت ال5 التانيين
ودى شكل كرة لما فردتها
5- بكون مجهزة طاسة ويا دوبك مدهونة بفرشة او منديل ورق زيت بسيييييييييييط جدا
واحط العجينة المفرودة فى الطاسة
ها تبدا تعمل زى الفقاقيع فى العيش فهاضغط عليها بمعلقة وبعدين دقيقة بالظبط واقلبها على الناحية التانية
وكمان دقيقة وخلاص يعنى لما يبدا يحمر بسيط
وده شكل العيش لما استوى
ودى صورة كمان
واكون مجهزة فوطة كبيرة عشان لما اطلع من الطاسة احطه فيها والفه كويس وبعدين انقله
فى كيس بلاستيك عشان مشينشف ويبقى زى الرقاق
احنا عايزينه طرى عشان يتلف كويس
ودى صورة كمان
اتمنى تكون الطريقة عجبتكم
وتكون سهلة التنفيذ
وما تنسونيش من دعواتكم لى ولأسرتى
و للأمة العربية بالوحدة والقوة والتقدم
اشوفكم على خير إن شاء الله فى موضوع جديد
استودعكم الله الذى لا تضيع ودائعه ابدا
مواضيع هذا القسم برعاية
ام كروان ام كروان 124965_2.gif فتكات ست الكل Fatakat 124965 المطبخ – المنزل