السلام عليكم و رحمة الله و بركاتة
بعد السلام و الذي منه انا مش بعرف ابتدي الموضوعات زي كتير من البنات هنا دمهم زي العسل و بيخلوني اضحك و انا بقرأ موضوعاتهم بس حبيت اشكركم على تقيمكم لموضوع العيش الشامي و اللي خلاه يتميز شكرااااا يا احلى بنوتات و اتمنى موضوعي دة يعجبكم
العيش الاسمر او العيش بالردة انا عن نفسي بموت فية و مش بلاقيه في مدينتي مش منتشر زي القاهرة كدة فأضطريت اتعلمة و اعمله خصوصا انه ممتاز للدايت و القولون و اللي عندهم امساك لانة مليان الياف
المقادير
كيلو دقيق اسمر او بلدي او دقيق ابيض من العادي و نخلط عليه مج 200 جرام ردة ودي من عند العلاف او بتاع الدقيق
2 ملعقة كبيرة خميرة فورية + رشة ملح و رشة سكر
+ ماء دافي للعجن مش هعرف احدد الكمية بس لغاية ما العجينة تتلم و يبقى مفيش دقيق في طبق العجين
ودي صورة للمقادير ماعدا المياه بضيفها واحدة واحدة و انا بعجن
و نبتدي نضيف الميه واحدة واحدة لغاية ما تتلم العجينة و اعجنها كويس اوي لغاية ما تتجانس كلها و يبقى لونها فاتح
اسبها ترتاح و تخمر في مكان دافي نص ساعة و ابتدي اقطعها كور على قد الرغيف و الكيلو تقريبا بيعمل من 25 الى 27 رغيف الحجم اللي في الصورة انا قاصدة اعمله صغير للسندوتشات عشان ميفيضش منه و يترمي
و اغلف الكور بالردة و اغطيها و اسيبها تخمر تاني و يتضاعف حجمها
كدة تضاعف حجمها ابتدي افردها و ارش من تحتها ردة عشان متلزقش و اغطيها لغاية ما اخلص الكمية كلها
بعد الفرد هبدأ اسوي العيش احط الطاسة التيفال مش مدهونة اي حاجة على اعلى عين عتدي في البوتجاز و اسيبها تسخن جدا ابتدي احط العيش من اول رغيف فردتة عشان يكون ارتاح و يرتفع معايا ان شاء الله احطة و اعد من 1 الى 10 و اقلبة و اعد تاني و اقلبة و اسيبة يستوي و يرتفع معايا
دي كل الكمية هحطها في الفريزر بعد ما تهدى و تبرد و اسحب منها على قد استخدامي اسيب العيش يفك او احطه في الميكروويف كأني والله لسة خبزاه رااااااائع
و دة قلبة من جوة مستوي عالاخر و زي الفل
يااااااااااااارب موضوعي المتواضع يعجبكم و تقيموة و انتو و ذوقكم
و السلام عليكم و رحمة الله و بركاتة
مواضيع هذا القسم برعاية
ماليكا ماليكا 72169_11.gif سوبر فتكات Fatakat 72169 بورسعيد – مصر