معلش بقا مش عارفة اكتب الموضوع فين بس انا قولت ده القسم الوحيد اللى بيشتروا دهب اكيد
كتير مننا مبيعرفش ازاي يشتري دهب وبيخافوا اوي من التجار اللى يضحكوا عليهم او يستغلوهم وستات كتير بيحبوا منظر الدهب وهو فى الفاترينة كده بيلعب وبيزغلل فى عينيهم وكمان هعرفكوا ازاي تعرفوا الدهب والمعيار والماركات وازاي تحسبي المصنعية كمان
ندخل عالموضوع بقا انتوا رغايين اوي ايه ده
1- متنزليش على محل واحد وتقولي ده تبعي لا لا لفي لفة حلوة كده واسألي هتلاقي بضاعتهم واحدة فرق مصنعيه وبس وممكن نفس الخاتم تلاقيه هنا بسعر وعند محل تاني اعلي شوية
2- ابعدي عن الحاجة اللى مليانة فصوص ليه بقا عشان لما هتيجي تبيعيها هتخسري فيها ليه بقا بتعمل وزن والراجل بيشيل منها المصنعية ساعه البيع وهاموت واعرف بيحسبوا حجم الفصوص ازاي يلا باب النجار مخلع بس سمعت قبل كده ان الدهب اللازوردي بيتباع بمصنعيته ساعتها تعملي ايه بقا ترجعيه لنفس المحل اللى باعلك وخليكي ناصحة
3- استبيعتي وعجبك خاتم بفصوصة بقا ما بصراحة اشكالهم بتبقى تهوس كده ورقيقين اوي امسحي الخاتم وشوفي فصوصة هتقع ولا لأ ونضفيه كده عشان ميعملش وزن يمكن حبه تراب مزنوقين هنا ولا هنا اما بقا لو ربنا فتحها علينا من وسعة و قررنا نجيب خاتم وفيه لامؤاخذة الماسة او حجر كبير كده محترم بضافرك كده حكي عليه الاصلي طبعا ميتجرحش هتقوليلي يعني هوه اللى مش اصلي هيتجرح من ضافري هقولك انا سمعت كده وخلاص الله
4- تشوفي نانسي و اسمها ايه اليسا لابسين فى التلفزيون دهب رقيق كده وعسول هوه حلو اه بس خللي بالك ده عايز لبسة واحدة حلوة تطلعي تعملي بيها الاعلان بتاعك ويتعان انما مش هتلبسيه وتتعايقي وتغيظي بيه سوسو وكوكو عشان عينين سوسو كوكو هتجيبه 15 حته انا قولت اهو
5- احلى حاجة فى السلاسل السلسلة اللى مش متلوية كده عشان ممكن وانتى محفتظة بيها تتقطم منك وتجيبيها فى سوسو وكوكو وتظلميهم
6- خللي بالك فيه محلات بيبعوا دهب مستعمل ابعدي عنهم يااااي دول هتلاقيهم اخدنليهم جنب كده واللمبة مش متلمعة ومعندهمش نجفة هتقوليلي بيبان عليهم هقولك لأ بيلمعوهم بميه دهب تديهم لمعة ولو جدعة وطلعتي انه مستعمل
7- الختم يا جماعة بصوا عليه كويس ولو لقيتي عليه حاجة مش موضحاه اعرفي انه مستعمل على طول
8- اخر حاجة الفاتورة يا جماعة خللوا بالكو ا البايعين اللى يقولكوا مش هديك فاتورة عشان الضرايب ولا عشان تمنها هيزيد 100 جنيه لالا ده بيضحك عليكي اوعي اوعي تخرجي من غيرها هتيجي تلاقي فيها عيب هيقولك معرفكيش ولا شفتك واحتمال يقول انك اخداه سرقة كمان بعد الشر حاجة كمان تكون مختومة وتاريخ الشرا صح والتمن كمان مكتوب صح مش مخنصر فى حبه وللو هتجيبي باحجار كريمة او الماس يكتبلك رقمه الحاجات دي بيبقى ليها ضمان خاص
9- طلعتي زيي بتحبي الدهب الابيض مع ان بيقولولي يبان عليكي انك لابسة فالصوا بس على مين كفاية انه انيق وجميل كده وازواقه خاصة ورقيقة المهم ربنا رزقك وجبتي خاتم كده ولا جالك كولية حطيه بعيد عن الدهب العادي وعن البرفانات وبقماشة ولمعية انا لو منك اصلا اعمله فاترينه خاصة واحطها قدام عينيا كده اروح واجي ابوس فيه اصلا طلع ان هو عبارة عن دهب اصفر عليه حبة بلاتين وحبة فضة ضحكوا علينا وقال ايه اسمه دهب
ايه ده الموضوع كبير اوي موضوع المصنعية بقا والانواع وازاي تعرفي الفرق هقولك فى موضوع تاني بس شجعوني لحسن بيبقا ناقص الف على فتوكة فتوكة اقولها حلو ولا لأ ويارب اكون افدتكوا
يلا سلامو عليكوم بقا مطولش عليكوا اصلي مش بحب الرغي خالص خالص وده سر هدووئي
bena.yalla bena.yalla 1078423_3.gif Fatakat 1078423 بورسعيد – مصر