السلام عليكم ورحمة الله وبركاتة …….
هقدملكم الأكلات اللى كانت فى يوم شم النسيم
بس للأسف انا ماكنتش مستعده للمسابقه عشان كده هنزل صور نهائية فقط من غير الخطوات
احنا خرجنا وقضينا اليوم ده فى منطقة زراعية تخص زوج اختى وكان يوم جميل
السفره عبارة عن
محشى ورق عنب
ملوحة
رنجة
فراخ مشوية عالفحم
بتنجان مخلل بالتوم
سلطة طحينة
فى بعض مننا مش بياكل الرنجة والملوحه عشان كده شوينا فراخ عالفحم + محشى ورق العنب
طريقة محشى ورق العنب /
الخلطة عبارة عن
بصلتين كبار مقطعين بدبلهم على النار فى معلقتين سمنى وبعدين اضيف حوالى 3 كوبايات رز يكون مغسول طبعا
وبضيف عصير 3 طماطم او حسب مقاديرك
وتوابل ملح وفلفل اسود وكسبره
واسيبهم يتسبكو عالنار وبعدين فى الاخر بضيف حزمتين كسبره مقطعه واقلب واسيبه يبرد عشان يكون جاهز للحشو
وورق العنب بياخد سلقة بسيطة فى مية فيها كمون وحبهان ولورا وانشلة واسيبه يبرد وبعدين بحشية الخلطة واسوية فى شوربه تكون مغطية لوش الحلة لحد ما يتشربها كلها
بالنسبه للفراخ
احنا تبلناها قبلها بيوم ببصل مبشور وكارى وكسبره وفلفل اسود وملح وبابريكا وخل
ويوم شم النسيم لفيناها فى القصدير واللى شوينا فيه ده اسمه كانون هههههه مش عارفه تعرفوه ولا لأ
احنا بنحط قالبين حجر كبار ووسطهم نحط خشب وفحم ونولع ونسيب الفراخ تتشوى بتاخد ممكن ساعه او ساعه الا ربع
الملوحة جاهزة من أسوان وكذلك الرنجه مغلفه
البتنجان المخلل ده بنديله سلقه بسيطه وبعدين بفتحه واحشيه توم مهروس وكمون وفلفل اسود وملح ونعصر عليه لمون
سلطة بابا غنوج
بشوح بتنجاتين كبار عالنار تتشوى وبعدين اقشرها واهرسها فى معلقة خل واضيفلها توم مهروس وكمون ومعلقتين طحينة وشوية ميه لحد ما يبقى سمكها حلو تقيل مش خفيف
اسيبكم مع الصور
ودى صور الأكل مجمعه
أتمنى يكون موضوعى عجبكم …. مواضيع هذا القسم برعاية
نادين2017 نادين2017 197210_26.gif فتكات ست الكل Fatakat 197210 الوادى الجديد / الخارجة – مصر
