بسم الله الرحمن الرحيم
ازيكم يا فتوكاتى ويا صحباتى عاملين ايه
ربنا يكرمنا جميعا بالذريه الصالحه ويتم نعمته على كل اخت لينا هنا حامل حملها
طبعا انتوا عارفينى وعارفين حالتى واللى ميعرفنيش هقوله انا الحمد لله ربنا من عليا بالذريه وعندى كمال ربنا يباركلى فيه عنده 4 سنين وطبعا من وقت مخلفته مستخدمتش وسيله غير تلت شهور ومن بعدها سيبه نفسي وابتديت اجرى عالحمل من تانى لما ابنى تم سنه وكام شهر لانى عارفه نفسي بحمل متاخر وطبعا يعنى كلمه مفيش حاجه مجربتهاش قليله الصراحه
خدو عندكوا بقى كشوفات وتحاليل ومتابعه كل شهر لمده 3 سنين وعمليات واشعه مهبله وبالصبغه ومنظار رحمى ومنظار بطنى وتحاليل للزوج وكى للمبايض واعشاب ووصفات وعسل النحل والطلح وده كان ممتااااااز مع الزووووووج جدا
ده غير الاساسيات الاستغفار الدعاء ليا وللغير والصدقه والصلاه والقران وزيت مرقى بالرقيه ومسك على منطقة الرحم ونوم بعد الجماع ساعتين عالضهر وكل جنب نصف ساعه يعنى عملت اللالى
واخيرا الحجامه اللى بالعلاج ده كلللللللللله صحيح محملتش عليها بس بميييت حقنه منشطه ولاول مره من يوم مبلغت من وانا بنت تنزلى دوره على 28 يوم تحسبيهم بالثانيه وتبويض ميه ميه حق الله انصحكم فيها وانا عملتها بتشريط وبجد ناويه انتظم عليها وممشيش على حقن لاتفجيريه ولا تنشيطيه تانى ابدا هيا الحجامه ثم الحجامه ثم الحجامه لانى فعلا لمثت اثرها وهعملها باذن الله الدوره القادمه
وطبعا كل الشوط الطويل ده نفسيتى تعبت لاقصى الحدود ووصلت لمرحله انى بطلت ادعى لانى يأست من الاجابه استغفر الله لحظات تملكنى فيها الشيطان وقالى بتحاربى فمين فربنا وعماله تتعبى نفسك وتدعى ده غيرك مبيركعهاش وربنا عمال يديهم فعيال وان لو ربنا كان عاوز يرزقنى كان رزقنى من زمان حتى وصل بيا الامر انى كرهت علاقتى مع زوجى وحسيت انها مبقلهاش لازمه ولحد معملت وقفه مع نفسي
قلت بس فيه ايه وكنت قعده حزينه كل اللى حواليا حملوا واللى حملوا معايا جابوا عيلين وتلاته وانا لسه وبتعامل على انى عقيمه وبفتح التلفزيون والاقى الايه بتاعت
(وعسي ان تكرهوا شيئا وهوا خير لكم وعسى ان تحبو شيئا وهوا شر لكم)
حسيت انها رساله ليا انا بالذات وانه لو ربنا مجازنيش بتعبى وجريى بالحمل هيجازينى بالثواب انه تعبى وجريى فيميزان حسناتى واحسبه عند الله كذلك وتحول دعائى وألحاحى من ذلك الى عدم دعاء ثم بعد هذه الايه الى
دعاء بالذريه ان كانت خيرا لى ان يمن الله عليا بها وتيقنت فى نفسي بان رزقى لن ياخذه غيرى
وكل اللى دعوت لهم بظهر غيب ان يرزقهم الله بالزريه قبلى رزقهم الله واتمنى ان يقر اعيننهم باجنتهم
وبعد ذلك ارهقنى قلبى من انتظار لحظه سماع خبر حملى وكنت فيوم بفكر امتى بقى حتى بطلت اعمل اختبار حمل لو البريود تاخرت
واجد هذا الدعاء وعجبنى جدا وحسيت بمدى روعته واد ايه بطمئن وتهدء نفسي بعد قوله واحساس بان فرج الله قريب وانه عليه هين
وهوا
(اللهم ارضيني بما قسمت لي حتي لا احب تعجيل ما اخرت ولا تأخير ما عجلت)
اوصيكم بيه
انا عارفه انى طولت عليكم بكلام ممنوش لزمه بس حبيت اذكر نفسي واذكركم ان كل وحده زيى نفسها تخاوى بنتها او ابنها احنا احسن من غيرنا ربنا من عليا بنعمه الذريه وجربنا الاحساس ده والحمد لله
وان بعد كده لما تواجهنا مشكله فى نقصان نعمه لازم نبص للى محروم منها ربنا يرزق اخواتنا المتزوجات اللى مذقوش نعمه الانجاب قبل مننا
انا كتبت الموضوع ده مش علشان اقولكم وصفه لا علشان اعرف نفسي واعرفكم ان الاستعجال مش هينفعنا بشئ وان تاخير كل كشئ يبقى ربنا شايف ان ده احسن لينا
على فكره ابنى بيلومنىوفاكر انى مش بحبه لانى مش عاوزه اجبله اخوات ادعوله ربنا يهديه واخاويه ان كان فالحمل خيرا لى
وابشركم ان اللى حملوا من اللى دعتلهم حالتهم كالاتى
اختى حملت والبويضه كانت متنفجرش نهائيا كل شهر وتعمل نزيف عالمبيض
صحبتى حملت ورحمها زو القرنين ربنا يكملها على خير
صحبتى التانيه حملت ومعندهاش تبويض وجوزها حيواناته المنويه 20 مليون ونسبه التشوه فيهم 75 فالميه
وصحبتى التانيه بعد تاخر سنه ونصف بدون سبب طبى معروف وقريبتى حملت بعد سن الياس بست شهور يعنى هيا فالاربعينات اخرها كمان
dodo4m82 dodo4m82 351927_5.gif فتكات ست الكل Fatakat 351927 فقلب جوزى وابنى حبيبي – فى بلاد الله لخلق الله