اخباركم ايه يا فتوكات يا قمرات ان شاء الله تكونوا بخير
كل سنه و انتم طيبين و ربنا يبلغنا رمضان بخير و يجعلها ايام الخير علينا كلن
انا عملت سمان محشى فريك فى موسم شعبان و طبعا قلت أصورلكم السمان قبل ما يطير
و
بالمرة طريقه عمايله
كفايه رغى بئا و اسيبكم مع الصور و الطريقه
ويارب يعجبكم
نبتدى بسم الله
المقادير
السمان حسب الرغبه طبعا
4 بصله متوسطه
بهارات وفلفل و ملح و حبهان وورق لورى
وبشره جوزة الطيب
وطبعا الفريك برضه حسب الرغب وممكن نص كيلو و ممكن كيلوا الا ربع
سمن بلدى
1ك بطاطس
فلفل ارنأوطى
طماطم
بصل ترنشات
فصين توم ترنشات
ملح و فلفل
الطريقه
نعسل السمان كويس اوى بالملح و الدقيق و نخلى الكبد و الاوانص على جنب
نحضر البصل و البهارات
نغسل الفريك حلو اوى و ننقعه فى الميه لمده 2 ساعه قبل بدايه الطبخه
نبشر البصله و نحطها ع النار تتشوح
ونضيف عليها الفريك و نقلبه كويس اوى
و نضيف بئا البهاراات كلها و الملح و الفلفل و بشره بسيطه من جوزه الطيب
وخلى بالك انا مش هحط الكبد و الاوانص مع الفريك
انا بحطهم فى الشوربه مع السمان يتسلقوا و احطهم مع الشوربه و شويه الفريك و بيبئوا حلوين اوى و بنحس بطعمهم مش بيتوهوا جوا الحشو بتاع السمان
وبعدين نستنى شويه لحد ما يتشرب خالص و نبتدى نحس ان الفريك شبه استوا و نحشى السمانه من بطنها و تحت الجلد بس بشويش خالص علشان متتقطعش منك و برفق كدا افتحى ما بين الجلد و اللحم و احشيها بالفريك بس مش اوى يعنى علشان متفرقعش مننا
وبعدين نربطهم بالخيط بالطريقه دى
ونحط حله ميه كبيره على النار و ننزل فيها ورق لورى و حبهان و مستكه
ونسيبها تغلى و بعدين ننزل بالسمان مع بعض و نستنى اقل من نص ساعه و هيكون تقريبا استوى زى كدا
وبعدين بئا نحضر صينيه البطاطس البيضا و طبعا كلنا عارفينها
بنقطع كل الصينيه ترنشات حتى الفلفل و الطماطم و كله
و أهم حاجه اننا نسقيها بشوربه السمان
و ادى السمان بعد ما استوى و رشيته فلفل اسمر و رشه صغيره اوى من جوزة الطيب على صينيه البطاطس
ونرص عليها السمان
وندهن السمان من فوق بالسمن البلدى و ع الفرن عدل و بعد شويه نطلعه تانى من الفرن و نقلب السمان ع الوش التانى علشان يتحمر ع الوشين ميبئاش ناحيه مسلوقه و ناحيه متحمرة
وادى اهه بعد السوا الكامل و بعد ما طلع من الفرن
و أدى صورة مقربه كمان علشان متقولوش حرماكم من حاجه اهه
خلى بالك متخليش صينيه البطاطس تنشف منك و زودى الشوربه لان السوس الى فى صينيه البطاطس بيكون طعمه حلو اوى و هيعجب ولادك
و بالنسبه للفريك بتحطى الباقى من الحشو فى الشوربه و طبعا الكبد و الاوانص معاه و تسيبيه يستوى و تغرفيه زى لسان العصفور ومعاه الكبدو الاوانص و إن شاء الله هتعجبكم اوى
معلش يا بنات نسيت اصوره
جربو السمان المحشى يا بنات و الله هيعجبكم اوى و احلى من الحمام كمان لان السمان لحم الصدر اكتر من الحمام و الذ فى الطعم
كل سنه و انتم طيبين يا بنات و رمضان الخير علينا كلنا
عايزة بئا دعوة حلوة منكم ربنا يصلح لى حالى ويهدى ابنى و يكون من الصالحين
مواضيع هذا القسم برعاية
NODY12 NODY12 1112612_3.gif فتكات رائعة Fatakat 1112612 اسكندريه – جمهوريه مصر العربيه