وحش الرجيم مابقاش وحش :) تجربتي في تخسيس 17 كيلو

السلام عليكم ورحمة الله وبركــــــاته

صباح الخيرات عليكن يالغوالي يارب أيامكم كلها خير وسعادة وبركة
أول مرة أكتب موضوع في القسم دا ..مع إني بزوره أحيانا لكن عمري مافكرت أكتب فيه ..لكن بعد تجربتي اللذيذة في تخسيس ال17 كيلو من وزني ..قلت لاااازم أقولكم عالموضوع دا لأني فعلا لقيت بنااااااات كتيييير يا حبة عيني بتعاني من الموضوع ده ومش قادرين على رجيم بعينه …

هدخل في الموضوع علطووول ومش هطول عليكم بإذن الله ، بسم الله :
الفكرة جاتلي لما لقيت وزني عمال بيزيد وخصوصا بعد حمل التاني عشان كانوا توأم فدوقت كل ألوان العذاب ومنها زيادة وزني وأنا مش قادرة على رجيمات نهاااائي لأني من الآخر شبعت رجيمات
فقلت طيب آكل كل حاجة لكن بكميات قليلة وأعمل حاجات بسيطة كده وأجرب ..لكن لازم تكوني حاطة في بالك انك هتخسي فعلا بالطريقة البسيطة اللي هتعمليها …شغل الإيحاء كده
بمناسبة الإيحاء : عايزة أقولك على موقف حصل مع أختي ..هي دكتورة وعايزة تقدم عشان تاخد النيابة ، والقسم اللي هي عايزاه نسا وتوليد ومعروف عندهم ان القسم دا عليه اقبال غير طبيعي فبيعلوا تنسيقه ومابياخدوش الا كام واحد كده معدودين على الصوابع
فقالت لصحابها يلا نقدم للنيابة ..قالولها لاء مش المرة دي خليها شوية أصلنا مش هنقبل فخلينا بقى قاعدين شوية (مع العلم هما عايزين قسم أطفال) قالتلهم لاء أنا بقى هقدم وسأقبل ان شاء الله
وفعلا قدمت وهيا الوحييييييدة اللي اتقبلت من صحابها مع ان قسمها الاقبال عليه أكبر
– موقف تاني مع أختي التانية كانت في كلية تربية وكانت بتذاكر كويس ..لكن كان معاها صاحبة شاطرة جدا وقلوقة أوي ..صاحبتها دي كانت تطلع من الامتحان تقول هنشيل المادة أختي ترد عليها تقولها لاء هننجح ان شاء الله ..المهم انهم الاتنين (أختي وصاحبتها التانية) ينجحوا وصاحبتها اللي قالت هنشيل المادة تشيلها فعلا مع انها أشطر منهم الاتنين

أنا قصدي ايه من كلامي ده : قصدي انك تقولي لاء هخس ماتكونيش فاقدة الأمل وتقولي هخس ازاااااااي !!! خلي عندك الأمل دايما حي واعملي عليه
ولو مثلا أكلتي حاجة مخالفة ماتقوليش يووووه كده هزيد في الوزن ..لاء قولي مش هتزودني اللقمة دي مش هتعملي حاجة

المهم نرجع لمرجوعنا (أصلي خايفة منكم طولت عليكم) كنت بعمل ايه بقى يا ست الكل منك ليها :
كنت بصحى من النوم بدري عشان أفطر جوزي يعني الساعة 6 إلا ربع كده أشرب كوب ماية دافي مائل للسخونة ..يعني سخونته تقدري عليها وأستنى 10 دقايق كده وبعدين آكل ساندوتش أي حاااااااجة نفسي فيها (نص رغيف بلدي وممكن رغيف كامل)..من الأكل اللي بعمله عاااااااادي خالص انشالله ياربي طعمية وبطاطس مقلية
أقفل بقي بقى لحد الغدا لكن أشرب ماية براحتي طبعا..ولما كنت بحس بالجوع كنت باكل خيار أو برتقال أو موز أو تفاح في أي وقت عادي خاااالص ..أو جزر لكن بحس ان الجزر والخيار بيجوعوا أكتر

آجي بقى في الغدا بكون مقللة الدهون على أد مااقدر في الطبخ يعني وآكل من أكل البيت عاااادي وطبق الرز اللي كنت باكله آكل نصه وكذلك المكرونة
والغدا كان عندي بيكون عالساعة 6 ونص كده ، بعد كده العشا ممكن آكل نص رغيف ساندوتش أي حاجة عايزاها وبعده زبادي جهينة
أو آكل فاكهة وزبادي ..لكن كان الأغلب ساندوتش وبعده زبادي ..الزبادي له عااااامل كبير جدا في التخسيس حتى لو تعشيتي كلي الزبادي برضو

ملحوظات :
– كنت بكثر من الفلفل الاسود في طبقي لو الأكلة بيتحط عليها مثلا زي الفتة أو الفاصوليا الخضرا أو ساندوتش السجق كده يعني
وكمان بحط شطة أحيانا والحاجتين دول بيعلوا الحرق
– كنت بشرب مالايقل عن لتر ونص يوميا
– كنت بشرب كوبايتين لبن بالقرفة يوميا …لأن الدكتور قال القرفة لوحدها بتخليكي عصبية أما القرفة باللبن طعمها حلو وبيخسس
وعلى فكرة ماكنتش بحليه بالسكر لأن القرفة نفسها حالية لكن انت لو عايزة حطي سكر دايت بس اختاري نوع نضيف زي مثلا فري كال أو أي نوع تاني خالي من السبرتام
– كنت بلعب رياضة بأي منظر (تنطيط رقص مشي كوكتيل على بعضه ) 4 أيام في الأسبوع المدة نص ساعة أو أزيد على حسب نفسيتي وطاقتي
وعلى فكرة كنت بشرب عصاير براحتي جداااااااااا وبسكر عادي كمان ..بس مايكونش كتير

هتبصي تلاقي نفسك بقيتي ريشة بجد خفيفة الحركة وتحسي انك خسيتي كتير وفي نفس الوقت بصحة وعافية وكمان ماتحرمتيش من حاجة أبداااااااا
وكنت باكل شوكولا كمان بس لو يوميا بتبقى حتة صغيرة (عارفة زي مستطيل من جلاكسي كده أو صباع من فلوتس أو سنيكرز أصغر حجم اللي هوا بـ 2ونص بس لو ده ماباكلش تاني يوم شوكولا)
يعني مكنتش محرومة من حاجة بتااااااااااتا

هتحسي بنفسك من أول أسبوع والله …وفجأة هتلاقي كل مايسرك بإذن الله
طبعا محدش يقولي أول مرة تعملي رجيم فالنزول كان سريع ..لاء نهاااائي أنا نزولي بطيء واتهريت رجيمات كمان …ووزني برضو مش فوق المية (عشان دول بينزلوا كتير بسرعة )

حبيت أقولكم على تجربتي المتواضعة عشان حاسة بيكم والله ..واعملي حسابك ان وزنك ده اللي كان زايد مش هيرجعلك تاااااااني نهاااائي ..يعني مثلا أنا سبت نفسي 4شهور كده من غير أي حسابات ولا محافظة في الأكل ولا أي حاااجة وزدت 2 كيلو بس لكن هرجعهم بإذن الله
ونفسي أخس كمان شوية والله المستعان

عايزة منك بقى أحلى تقييم مش عشاني والله ..المرة دي حابة أكتر عدد من البنات اللي عندهم المأساة دي يقرأوه عشان أشيل هم من على قلبهم ..لأن الرجيم والتخسيس عبء والله الا لو طبقناه صح
ولا حرمان بعد اليوم
ودعوة حلوة كده بظهر الغيب ولكم بالمثل ان شاء الله …
ولو حد عنده أي سؤال يتفضل أنا في الخدمة

وانتظروني قريب جدااااااااا في :
تجربتي في تطويل شعري وتكثيفه
وتجربتي في تقليل نمو الشعر(جدا جدااااااا) الغير مرغوب فيه طبعا

تحياتي وأجمل أمانيّ بحبكم جدااااااااااا ..وإلى الملتــــقى


ry7anh ry7anh 31437_3.gif سوبر فتكات Fatakat 31437 الشرقية – مصر

لقراءة ردود و اجابات الأعضاء على هذا الموضوع اضغط هناسبحان الله و بحمده

رأي واحد حول “وحش الرجيم مابقاش وحش :) تجربتي في تخسيس 17 كيلو”

أضف تعليق

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.