كل ما يخص الإجهاض المتكرر بعد عناء طويل وتجربة مريرة 2024.

السلام عليكم ورحمة الله وبركاته

ازيكو يا فتوكات عاملين إيه يارب تكونوا بأتم صحة وعافية
وربنا يرزق كل بنت بالزوج الصالح وكل زوجة بالذرية الصالحة
وكل حامل يكملها على خير وكل أم يخليلها ولادها ويفرحها بيهم ويعينها على تربيتهم
اللهم آاااااامييييييين …

أنا يا بنات متزوجة من ثلاث سنوات وحملت 6 مرات وكل مرة كان بيحصل إجهاض
الحمدلله على قضاءه وقدره وأنا على يقين بإن ده الخير ليا إن شاء الله

أول حاجة لازم نؤمن ونوقن حق اليقين إن ده قضاء ربنا وقدره ومكتوب لينا من قبل ما نتولد وهوا في كل حال الخير لينا بإذن الله

وأنه لا يمكن أي دكتور في الدنيا يقدر يخلينا نخلف قبل الميعاد اللي ربنا كاتبه
وعارفين إن الشفاء والرزق بإيد ربنا سبحانه وتعالى بس إحنا بنعمل كل ده من باب الأخذ بالأسباب اللي ربنا أمرنا بيه

أنا طبعا حبيت أكتب الموضوع ده لكل أخت عانت من الإجهاض لإني من مروري على الدكاترة حسيت إن في دكاترة كتير وأساتذة كبار معندهمش القدر الكافي من العلم
وبعدين يعني أنا جوزي وأهله الحمدلله ناس طيبين مبيتكلموش بس في ناس كتيير الموضوع ده بيسببلهم مشاكل….

أنا هكتبلكم تجربتي إن شاء الله وكل التحاليل اللازم عملها ودي حاجة ضرورية جدا عشان أنا مجمعاهم من كل الدكاترة ويارب تستفادو..

أول حمل ليا على الإسبوع السادس الدكتورة قالت تيجي كمان اسبوعين نشوف النبض
وبعد الأسبوعين قالت الكيس حجمه لسه ست أسابيع زي ما هوا ومافيش جنين جواه ولا في طبعا نبض ولازم ينزل
وقالتلي ده بيحصل كتير في أول حمل وبيكون الرحم لسه مش مهيأ وكده
وطبعا عملت التحاليل العادية بتاع الأملاح والأنيميا وال RH والسكر
وادتني حبوب ميزو تاك عشان ينزل لمدة ثلاث ايام
كانت بتعمل ألم فظيع وبعد كده قالتلي خلاص لو مش مستحملة نعمل عملية تنظيف وعملتها الحمدلله وكانت ب800 جنيه
وده كان خطأ منصحش أي واحده تعمله لأني قعدت بعدها لمدة 8 شهور مفيش حمل خالص

وبعد 8 شهور حصل حمل للمرة التانية وفرحت أوي وحصل نفس النظام بالظبط اتفاجئنا أكتر من المرة الأولى
وبعدين قلنا نغير الدكتورة ورحت لدكتورة في طنطا استاذة في طب طنطا وقالت لازم ينزل بس إعملي تحاليل الفيروسات
اللي هيا التكسوبلازما (مرض القطط) IgG & IgM
والسايتو ميجالو فايروس (IgG & IgM (cmv

وطلع عندي السايتو ميجالو IgG ونسبته 300 الدكتورة عملتلي عليه قصة وادتني علاج اسمه سيكلوفير 800
وقالتلي كرريه بعد اسبوعين وكررته ولقيته بقا 800

واحد صاحب جوزي قاله ده في دكتورة شاطرة جدا وفتحت مستشفى جمبنا وتبقا رئيسة قسم في طب القصر العيني
روحنالها وعملت العمليه عندها (مرضيتش آخد الميزو تاك تاني وقلتلها على العمليه على طول)
عملتها ب 2500 جنيه وفي الآخر اكتشفت ان صاحبتي عاملاها ب100 جنيه
يعني اسألوا الأول على الأسعار
والدكتورة خدت عينة من السقط تحلله وما اديتناش النتيجة عشان تربطنا عندها وقالت انها كويسه واحنا مستنيين يحصل حمل ونعمل اللازم

وقالتلي الفايروس ده اصابة قديمة ومش بيأثر على الحمل انسيه خالص

وطبعا بما إني غلطت نفس الغلط وعملت العملية تاني قعد سبع شهور عقبال ما حصل الحمل التالت

وخلال الفترة دي الدكتورة كانت بتستغلنا ربنا يهديها عملتلي اشعة الصبغة ب 700 جنيه
بس بصراحة ايديها خفيفة جدا
وطلبت تحليل الحيوانات المنوية والحمدلله طلع كويس

وكان كشفها 150 والسونار 200 ومعندهاش استشارة
وكنا طبعا عندها كل يومين
وكل مرة تقولي لو الدورة جت تعالي ولو مجتش برضه تعالي وأما اروحلها تقولي خدي كلوميد مع اني الحمدلله تبويضي كويس

أول ما حصل الحمل التالت قالولنا سيبكو من الدكتورة دي ده فيه دكتورة في فيصل محترمة وعارفة ربنا وشاطرة
وروحنالها ومعملتش أي حاجة قالتلي سيبيها على ربنا

خالتي كانت بتروح لدكتور وجوزي معترض على حكاية دكتور راجل
قالتله نبذة عن حالتي قالها دي بسيطة وهتحتاج حقن تحت الجلد بس من أول ما تعرف انها حامل

أنا بقى قلت لدكتورتي كده قالتلي اه دي اسمها كلكسان وكان معدي اسبوعين وتقولي عادي مفيش مشكلة
واديتني كلكسان 40 لمدة عشر أيام الإبرة الواحدة ب30 جنيه
ومن غير ما تطلب تحاليل خالص مش عارفة ازاي

والحقن زرقتلي دراعاتي وكده (ودي اكتشفت انها حاجة طبيعية) قالتلي خلاص خليها يومين في الإسبوع صومي اتنين وخميس وخديهم
برضه من غير ما تطلب تحاليل

والحمل نزل بس بقا قالتلي استحملي الميزوتاك واستمريت عليه لمدة اسبوعين لحد الكيس ما نزل

روحت عملت عمرة وشربت زمزم ودعيت كتير ورجعت كان الموعد اللي حصل فيه السقط استنيت البيريود واتأخرت يومين وعملت التحليل وطلع حمل

سبحان الله كنت بعمل العمليه بقعد بعدها 7 و 8 شهور والمرة دي البيريود مجاتش أساسا

فرحنا وقلنا دي نتيجة العمرة وزمزم

ولكن للأسف حصل نفس الموضوع والحمل التالت نزل طبعا بنزله بالميزو تاك لأن مبيكونش فيه ولا نقطة دم ولا ألم يعني ما بيسقطش لوحده

واستنيت البيريود في موعد الإجهاض وما جيتش وعملت تحليل وطلعت حامل

قلت خلاص مش هروح لحد خالص خليها على ربنا
روحت في آخر التاني الدكتورة قالتلي انتي جاية بعد ايه الحمل لازم ينزل

في الوقت ده في دكتور جوزي يعرفه قاله على المركز القومي للبحوث العلمية في الدقي
فيه عيادة متخصصة للإجهاض المتكرر وأمراض الجنين يعني هوا ده تخصصهم اصلا

روحنالهم وكان الكشف 25 جنيه بعد الألوف اللي احنا دفعناها دي كلها

كان في غرفتين غرفة الدكتور خالد جابر الكبير محدش بيدخل الا لما يتحول من الغرفة التانية
فيها تلات دكاترة تابعنا مع واحد منهم جبناله التحاليل وحكيناله بالتفصيل اللي حصل في الأربع مرات
كتب كل حاجة في الفايل ودخل للدكتور خالد شرحله وبعدين احنا دخلنا

طلب بقا مني شوية تحاليل حلوين كده وقالي مفيش ملح خااااالص مش عشان الأملاح مش عارفه قالي حاجة تانية مش فاكراها
ومفيش منبهات خاااااالص ومفيش حلويات وشبسيات وبيبسي كلللله ممنوع
وممنوع حدوث حمل قبل ست شهور باستخدام طرق العزل الطبيعي
والحمل ده لازم ينزل عشان اتعالج في الست شهور دول
والتحاليل اللي طلبها:
anti-cardiolipin IgG & IgM
lupus anticoagulant
fsh
lh
progesterone
complete blood picture
urine analysis
glucose after 2 hours
fasting blood glucose
prothrombin time (pt)
ptt
وأخيرا تحليل الكروموسومات

الأخير ده عشان نطمن ان الجينات نفسها كويسه وعشان فيه قرابة من بعيد
بس قالوا مالهوش علاج خالص وفضلنا قاعدين على أعصابنا شهر ونص لحد ما النتيجة طلعت عشان بتتحلل في ألمانيا
وبعد كده الدكاترة قالوا مالهوش اي لازمة خالص واحنا عاملينه ب700 جنيه قالوا بيبقا في حالات نادرة جدا جدا جدا

وطبعا لقيت المشكلة عندي في أول تحلليلين وعرفت ان هما دول الأجسام المضادة سبب السقط
(يعني كان لازم من أو إجهاض الدكتور تكتبلي التحاليل اللي بتسبب السقط)
ولكن قدر الله وما شاء فعل وفعلا كان كلام الدكتور بتاع خالتي صحيح
وعلاجها الابر اللي تحت الجلد للسيولة

عملت التحاليل دي كلها وطبعا استنيت البيريود تيجي عشان انا كنت مخليه بالي جدا جدا انه ميحصلش حمل
بس قدر الله وحصل الحمل الخامس وخفنا نروح للدكتور ده تاني عشان ميزعقلناش ههههههههه

بس كنا بنتابع بالتليفون مع الدكتور اللي تحت ايديه ربنا يجزاه خير

وهوا الدكتور كان قايلنا تتابعوا مع دكتورة واحدة بس والتحاليل في معمل واحد بس
وأنا بصراحة كنت روحت ل 100 دكتورة هههههه

المهم قلنا خلاص نشوف دكتورة كبيرة وفعلا روحنا عند واحدة مشهورة جدا برضه
وأول كشف 200 جنيه ومش عايزة تفتح بقها بكلمة واحدة
كان نفسي تشرحلي حالتي وتقولي وتفهمني
بس لا كنت حساها بتبيعلي الكلام وبتديني علاج لحد الإسبوع اللي بعده عشان اروحلها وتجددلي العلاج وهكذا

قلتلها على الحقن قالتلي لا لما النبض يظهر طب ازاي والنبض اصلا مبيظهرش
تقول هوا كده مفيش حاجة اسمها تاخدي الحقن دي دلوقتي

وروحتلها الاسبوع اللي بعده العيادة موووووووووت وفي نص ده راحت طالعة شقتها تصلي العصر ومنزلتش ههههه
كان بقالنا 3 ساعات عندها كنت حاسة ان جوزي ممكن يطلع يضربها هههههه
اتخنقنا وروحنا

وطبعا الحمل ما كملش ونزل

فضلت بقا مانعة الحمل ست شهور

خدت كورس علاج للأجسام المضادة عبارة عن كورتيزون اسمه هوستاكورتين هـ
أول أسبوع 4 حبات مرة واحدة وتاني اسبوع تلاته وبعدين اتنين وبعدين واحدة والأسبوع الخامس والأخير يوم حبة ويوم لأ
واستمريت على الأسبوسيد (اسبرين الأطفال) وحمض الفوليك 5 مل ولسه ماشية على دول لحد دلوقتي
والحمدلله نسبة التحليلين اتظبطت خالص

وقال يحصل حمل عادي دلوقتي
عدى تلات شهور بعدين حصل الحمل
حصل ازاي بقا؟؟ الدورة اتأخرت 15 يوم وعملت فيه 3 تحاليل منزلي ومفيش حمل
قعدت اعمل رياضة وانط الحبل كتيييييييير عشان تنزل وروحت للدكتورة اديتني حقنتين تنزل الدورة بس قالتلي تعملي تحليل قبل ما تاخديهم
وعملت التحليل وكانت الصدمة ان فيه حمل لأني كنت عملت مجود جبار
اول ما عرفت روحت جري على المختبر عملت التحليل عشان اتأكد ان النسبة لسة كويسة
ورجعت للدكتورة الأولانية خااااااااااالص لأني عرفت ان ما فيش فرق خاااااااالص الا ان الكبار بيعملوها تجارة وبس

اديتني حقن كالهيبارين 500 قالتلي نفس الكلكسان بالظبط بس ده ارخص بكتير يعني الكلكسان الواحدة ب 30 أما دي التلاتة ب 18 تقريبا
وقالتلي ريحي خالص عشان الحركة اللي عملتيها ومادام مفيش دم ولا وجع وسط واسفل البطن يبقا اطمني واديتني مثبت
وعملت سونار مشافتش حاجة قالت يبقا الحمل حصل متأخر ولسه منزلش الرحم

بعد 5 أيام كان موعد التحاليل طلع والحمدلله لقيت النتيجة تمام وبدأت أحس بدوخة ودي أول مرة تحصل
نمت وصحيت وانا لسه عالسرير مقومتش حتى ولقيت وسطي بيوجعني قلقت وعلى بالليل كان الدم نزل
كلمت الدكتورة معرفتش أوصلها خالص ودي كانت مشكلتي مع كل الدكاترة
قلت لجوزي هاتلي تحليل حمل يحسن ما اكونش حامل اصلا والتحليل كان بايظ
جبت التحليل لقيت خطين برضه بس الخط التاني خف خالص بعد ما كان واضح
كلمت الدكتورة قالتلي خدي ابر مثبته قلتلها عالتحليل قالتلي لا كده بقا توقفي العلاج كله وربنا يعوضك خير

الصبح كان الكيس نزل أو مره ينزل لوحده ونزل مكور كد غير كل مره
كان بينزل منكمش خالص من كتر ما باخد الميزو تاك ينزل الدم كله والكيس ينزل في الاخر فاضي خالص

فكان عندي احساس ان المرة الأخيرة كان سقط عادي غير كل المرات اللي قبله

والحمل الأخير ده عدى عليه 5 شهور

واحدة صاحبة قريبتنا بقا كان عندها مشكلة وماشاء الله دلوقتي حامل قالتلي على الدكتور شوقي رشوان
روحتله امبارح طبعا اوريله التحاليل واشوف رأيه معملتش ولا سونار ولا كشف
وقالي لو احتجت سونار هطلبه منك تعمليه بره

بصراحة انا بقالي تلات سنين بلف على دكاترة مفيش حد فهمني يعني ايه اجهاض متكرر زيه
قبل ما يشوف التحاليل حتى شرحلنا كل حاجة بالتفصيل ربنا يبارك فيه

قالي أولا الحمدلله انه بيحصل حمل يبقا كده ان شاء الله فيه علاج
هوا اللي قالي تحليل الكروموسومات مالهوش لازمة
وقالي الاجهاض المتكرر ما بيخرجش عن تلات محاور
المحور الأول خلل هرموني
والتاني ميكروبي أو فيروسي (التكسوبلازما والسايتو ميجالو)
والتالت مناعي (الأجسام المضادة)

وطبعا من التحاليل باين ان عندي الخلل المناعي
ان من حكمة ربنا ان الجنين لما يدخل الرحم المناعة مش بتهاجمة غير عن كل الأعضاء اللي بتتزرع لازم يكون فيه توافق بين الجسم والعضو اللي هيتزرع
قالي بس حكمة ربنا بقا لو واحد من امريكا اتجوز واحدة من الصين هيخلفوا بيبي كويس سبحان الله
انا بقى عندي لا المناعة بتهاجم الجنين برضه عشان كده كنت باخدلها كورتيزون

وكمان الفايروس سايتو ميجالوا اللي قلتلكو عليه فوق اللي نسبته زادت وقالوا ده مالوش دعوة
قالي لا ده المفروض اصابة قديمة يعني ما تزيدش وبما انا بتزيد يبقا يبقى فيها مشكله ونعالجها
قالي بس ده ما بيعملش اجهاض في التلات شهور الأولى بيعمل في الرابع مثلا

يعني الحمدلله كنت اتعالج من الأجسام المضادة الاقي الفايروس ده في وشي

وطلب مني أعيد نفس التحاليل دي تاني اللي فيهم مشكلة وتحاليل تاني هكتبهم دلوقتي:

السايتو ميجالو فايروس (IgG & IgM (cmv
anti-cardiolipin IgG & IgM
lupus anticoagulant
ANA
RF
TSH – T3 – T4
Prolactein
AMH اسمه عشان مش كل المعامل بتعرف اختصاره: anti-mullerian hormone

وطبعا قالي ازاي الدكتورة تعمل تحليل للسقط وما تديكوش النتيجة دي ضرورية جدا
ربنا يهديها الدكتورة دي

بس وهيا دي تجربتي وهروح أعمل التحاليل وقالي أنا بفضل معامل البرج عن المختبر

والله ويشهد الله أنا كتبت الموضوع ده حبا ليكو في الله ومن باب عدم كتم العلم ولأني مريت بالمعاناة دي وحاسة بكل واحدة مرت بيها
أنا طولت عليكو بس إن شاء الله تفيدكم جدا
أنا عشان أعرف المعلومات دي كنت دفعت ألوف عند الدكاترة وفي المعامل
دكتورة واحدة دفعت عندها تقريبا 10000

أي واحدة عندها المشكلة دي تطبع اسامي التحاليل دي وتعملها
لأن بإذن الله هيا دي التحاليل المطلوبة كلها

وأهم حاجة أي واحدة تقرأ الموضوع متنسانيش بالدعاء في ظهر الغيب
وربنا يرزق كل واحدة تتمنى الذرية الصالحة

والسلام عليكم ورحمة الله وبركاته

تثبيت 6/12

**اللؤلؤة** **اللؤلؤة** 152238_2.gif سوبر فتكات Fatakat 152238 FATAKAT – FATAKAT

سبحان الله و بحمده