لازم تبطل !!
مش عارف ليه حاسس إنك أكيد عايز !! أصل لحد إمتى حنبقى كده ، الدنيا كله بتتغير وإشمعنى أنا وانت مش حنتغير ، أنا حاسس إن جواي شعور رهيب إني لازم أبقى إنسان تاني ، مش مشاركني الإحساس ده ، كابوس الإحساس بالقهر إنزاح، مبقاش فاضل غير إحساس الواحد بالذل قدام نفسه ، أنا ليه مليش هدف ، أنا ليه مليش دور ، ليه باعمل حاجات مش راضي عن نفسي فيها؟ طيب ولحد إمتى ؟ وإيه أخرتها ؟
طيب حاتغير إزاي ؟؟ دوَّر على نفسك أول حاجة ، دوَّر إيه اللي معجزك ، واتكلم بصراحة ، بلاش تلف وتدور ، وتحاول تبعد الإجابة اللي ضميرك بيقولها ليك .
أيوة إنت مشكلتك الخطيرة إنك بعيد عن ربك ، أخطر حاجة إنك يكون قلبك محروم منه ، إنك مش قريب منه ، إنك مش بتاخد القرار إنه يبقى " الأول " في حياتك ، ممكن تقولي ليه !!
تتصور إن في حد أحن عليك منه ؟ تتصور إن في حد أرحم بيك منه ؟ طب ليه مش عايزه !!
تخيل إنك بتقول" ربي " فيناديك " عبدي " ،
تذكر اسمه .. تقرب خطوة ، تلاقيه قرب منك خطوتين ، يحبك فيقذف في قلبك حبه ، تلاقيك طاير تهتف تصرخ " وعجلت إليك ربي لترضى " ياااااااه شعور ما يتوصفش ، مش عايز المتعة ده ليه ؟!!
بالله تتصور إنه يبسط يده لك وإنت مديله ظهرك "يبسط يده بالليل ليتوب مسيء النهار ويبسط يده بالنهار ليتوب مسيء الليل " ، حد في الدنيا يتصور المعنى ده وقلبه ما يحنش لربه !!
مشغول بإيه عنه ؟ كل خير إنت فيه منه ، فاهم إنك حتلاقيه عند غيره إزاي ؟ إحنا أكيد كلنا بنحبه بس مش عارفين إزاي نقرب منه .
ابتدي دلوقتي الخطوة ، وإحنا حنستعد مع بعض لرمضان السنة دي ، وإحنا ثوار وأحرار .
عايزين ثورة على كل شيء بيبعدنا عن ربنا تحت شعار " معاذ الله إنه ربي أحسن مثواي "
حتقول : للسيجارة .. للمخدر .. للموقع الإباحي ..للعادة السيئة .. للصحوبية .. للتبرج .. للكذب … للنفاق .. للغيبة …. للنميمة .. للحياة الضنك "لا " و " ألف لا "
أنا لازم أتحدى نفسي علشان أرضي ربي ، وحبتديها بكلمة " لازم أبطل " لأن البطل هو اللي يبطل ، لأننا لازم مع رمضان السنة ده نتولد من جديد ، ونبدأ صفحة جديدة مع ربنا ، بنحبه وحندلل على حبنا ليه ، بأعمال وقرارات حنبتديها بالوصفة ديه :
1- مفيش صلاة حتفوتني في معادها .
2- لازم كل يوم 100 استغفار وصلاة على الحبيب ، وأذكار الصباح والمساء .
3- كل يوم حتصدق ولو بجنيه علشان الصدقة بتطفئ نار المعاصي .
4- لازم اقرأ كل ليلة سورة تبارك قبل النوم علشان تحميني من عذاب القبر .
5- صيام الاثنين والخميس ، و (13 -14-15 ) من كل شهر عربي .
6- عايز أقرأ 10 صفحات قرآن .
علشان تقويني طاعة ربنا على قرار " لازم أبطل " يلا يا بطل ، اثبت لربنا قد إيه بتحبه لو كنت بجد " عايز ربنا "
منقول عن الاخت بسبوووسة فتكات
هند بنت عتبه هند بنت عتبه https://files.fatakat.com/customavatars/avatar760287_2.gif سوبر فتكات Fatakat https://forums.fatakat.com/member760287 فى بلد من بلاد الله – مصر
