حققى احلامك وريحى بالك 2024.

السلام عليكم
مين فينا معندهاش حلم عاوزة تحققه مين فينا معندهاش مشكلة عاوزاها تتحل وبتسرح فيها ليل نهار وتفكر فيها لغاية مادماغها توجعها وكل متفكر المشكلة يطول حلها وتتعقد اكتر مين

كتير اوى بنفكر فى مشكلة ونقعد نفكر وكتير ندعى ربنا ونلاقى الدعاء ربنا مستجابهوش طيب كتير منكم بتسالوا ازاى اليقين يتولد فى قلوبنا واحنا خايفين
طيب تخيلوا حاجة واحدة بسسسسس ممكن تولد فى قلوبكوا الراحة والطمانينة واليقيييين والرضا

تخيلوا معايا كدة ولد عنده 15 سنة والده غنى جدا وعنده قصر وعربية وفلوس كتير وولد تانى فى نفس السن يتيم الاب وفقير وامه عاجزة مين هيكون عنده مشاكل اكتر ؟؟؟؟؟؟ مين هيفكر اكتر وهيتعب اكتر كلنا طبعا عارفين ان الفقير اليتيم هو اللى هيفكر اكتر وهيتعب نفسيا وجسديا اكتر من الولد التانى اللى مبيحملش هم لاى حاجة عارفين ليه ؟؟؟؟ لان الولد الغنى عنده باباه كل مهيطلب منه حاجة هيبقى واثق انه هيديهاله وكل ما يكون عنده مشكلة مش هيفكر فيها لانه عارف ان باباه هيحلهاله وواثق من كدة لانه متأكد ان باباه بيحبه ومش هيرفض ليه اى طلب

الحقيقة ان دة مثال واقعى جدا ولله المثل الاعلى ربنا مالك كل شيء وارحم بينا من امنا وابونا وبيحبنا وامرنا بالدعاء يعنى هنحل مشاكلنا كلها و احلامنا هتتحقق وهناخد ثواب والغريييييبة ان كل منريح دماغنا هتتحل اسرع

هتقولولى ازاى بالدعاء ؟طيب منا بقالى ستنين تلاتة بدعى ودعائى مش مستجاب ؟ تخيلى انك ممكن ربنا يستجيب لدعائك فى ثانية واحدة بحاجة واحدة بس

هى التوكل على الله
هتقوليلى متوكلة على ربنا اكيد هقلك طالما مشاكلك متحلتش وتعبانة يبقى انتى عمرك معرفتى ايه هو حق التوكل على ربنا

فيه حديث بيقول "لو توكلتم على الله حق توكله لرزقكم كما يرزق الطير تغدوا خماصا وتعود بطانا "

طيب ازاى اتوكل على ربنا حق التوكل
بسم الله الرحمن الرحيم "ان الله لا يغير مابقوم حتى يغيروا ما بانفسهم " يعنى لو قعدتى تدعى ميت سنة وانتى تعبانة وخيفة وزعلانة وبتشكى للناس مفيش حاجة هتحصل وربنا هيسيبك للناس ولو دعيتى بقلبك دعوة واحدة وتوكلتى فيها على الله حق التوكل هتتحل باسرع وقت ان شاء الله

كيف نتوكل على الله
التوكل على ربنا هو السر اللى من غيره من وجهة نظرى مينفعش الدعاء يستجاب والله اعلم لانه بيجمع كل شروط استجابة الدعاء الى هى اليقين والايمان والرضا

ازااااى نتوكل على ربنا بجد

متفكريش فى الموضوع: بالعربى يعنى متخافيش من اللى جاى ومتتوقعيش السوء ابدا وكل متيجى هتخافى قولى انا امرى دلوقتى بين ايدين ربنا وانا لجأت ليه وهو ارحم بيا من ابويا وامى معقول لما الجا ليه هيسيبنى ؟ يعنى ربنا بيدبرلى امرى ومهما فكرت من هييجى احسن من تدبير ربنا

اتخيلى الحاجة الحلوة :اتخيلى اى حاجة حلوة عاوزاها تحصل ليكى وعيشى فى الدور على قد متقدرى وفى الاخر ابتسمى وقولى يارب حققلى اللى اتمنيته

اعملى الاسباب واكفرى بيها : يعنى لو حاجة تقدرى تسعى فيها اعملى اللى عليكى ومتفكريش ابدا فى اللى عملتيه متفكريش غير فى ربنا اللى امرك بين ايديه

يلا قومى اتوكلى على ربنا بجد سيبيله المشكلة كلها بين ايديه وهو عمره مهينساكى اطلبى منه اى حاجة فى الدنيا ومتفكريش بعدها فوضيله امرك ونامى وانتى مطمنة ان طلبك فى ايد امينة جدا متشتكيش لاى حد وقولى بس يارب دبرلى امرى ومفيش حاجة هتكون احسن من تدبير ربنا اللى خلقنى وخلقك وخلق الكون دة كله وبيمشيه بنظام وترتيب ريحى دماغك من التفكير وتوقع السوء والخوف خللى امرك بين ايدين ربنا وعيشى حياتك هتحسى بالمتعة

وادعيلى بالمرة ربنا يجمعنى بالانسان اللى بحبه فى الحلال وميحرمنيش منه ابدا ويرزقنى منه بالاطفال الحلوين اللى نربيهم على طاعته ويخلينى الوحيدة الجميلة فى نظره

استغفرك يا الله استغفرك يا الله فتكات هايلة Fatakat 605007 القاهرة – مصر

سبحان الله و بحمده

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.