تعالى اعلمك ازاى تخشعى فى الصلاة وتكون متعة وراحة 2024.

كتير اوى من الناس بتصللى علشان الصلاة فرض ولازم يادوها وميعرفوش هى مفروضة علينا ليه وساعات نقوم نعمل حركات بجسمنا بس علشان يكون اسمنا اديناها وخلاص وساعات نفكر فى مشاكل الدنيا كلها واحنا بنصللى والغريب ان بيجيلنا كل حلول الدنيا والافكار ف دماغنا واحنا بنصللى ونبص نلافى نفسنا بنقول صدق الله العظيم ونكرر الحكاية دى كذا مرة فى اليوم وناسيين ان ربنا مخلقش حاجة فى الدنيا عبث وكله خير لينا

المهم عاوزة ادخل فى الموضوع وعاوزة اقلكوا ازاى اخللى الصلاة ممتعة جدا

اول حاجة علشان نأدى الصلاة على وقتها احسن طريقة هى اننا نكون متوضيين كل ماندخل الحمام نتوضا علشان اول حاجة "ان الله يحب المتطهرين " ومن ناحية تانية يكون سهل علينا نتوضا علشان نقوم علطول اول ما الادان يأدن عارفين ليه اللى عاوز يصللى الصلاة على اوقاتها ومن غير كسل لازم يقوم اول ما الادان بيأدن

-لان الشيطان ساعة الادان بيكون مش موجود فلو قمتى ساعة الادان هتلاقى نفسك بتقومى بسهوووولة جدا لكن لو استنيتى بقا بعد الادان هتلاقى الشيطان جه لحضرتك وقعد يقنع فيكى ويقلك طيب استنى شوية وفيها ايه وهكذا لغاية ماتلاقى الادان اللى بعده بيأذن

-ثانيا و الاهم لان الله اكبر من اى شيء يعنى ايا كان فى ايدك ايه ربنا اعظم من اى شيء فى الدنيا مينفعش نكون بناكل مثلا وعندنا معاد نقابل ربنا ونأجل المعاد لغاية مانخلص اكل او مذاكرة او اى حاجة ربنا اعظم من اى حاجة دة لما بيكون حد عندنا معاد معاه بنأجل اى حاجة علشانه فمابالك رب الكون كله لازم نتسابق علشان نكون اول الناس اللى بتقبل على ربنا

ودى طريقة جميلة تخلينا نحب الصلاة ونقبل عليها ونخشع فيها ونعرف فايدتها واللى هيعملها هيحس برااااحة حلوة اوى

-اول حاجة نتخيل اننا واقفين قدام ربنا وعلى يميننا الملايكة بتكتب كل كلمة هنقلها وبالاصح مش هنتخيل دة هو دة فعلا اللى بيحصل وسبحان الله تلقائيا كدة واحنا بنصللى دايما لو اتخيلنا هنحس ان الملايكة اللى بتكتب كلام الصلاة على يميننا وصعب لما اتخيلهم على شمالى انا دايما بحسهم على يمينى

-تانى حاجة نتخيل الكلام طالع من بقنا وشكله وهو طالع والملايكة جنبنا تكتبه واحنا بنقوله لربنا

-تالت حاجة ننوع فى الايات نجيب ايات بنحبها وشدانا طبعا هو كلام الله كله عظيم بس نجيب الايات اللى أثرت فينا نقرا القران وكل ماتأثر فينا اية نحفظ الجزء اللى شدنا وانا من رأيى الايات اللى هتشد الناس هى اللى فيها دعاء طبعا وكمان اللى بتبين خلق الله وقدرته ونكتب الايات دى فى كراسة ونحفظ منها اللى نحبه ومش لازم جزء كبير اى جزء أثر فينا واهو منها نتدبر القران ونقراه

-رابع حاجة واحنا بنسجد نتخيل او برده دة اللى بيحصل فعلا هو ان ذنوبنا بتتساقط ونطول فى السجود امام الله عز وجل

-خامس حاجة وانا دايما بعملها (سجدة الشكر ) هنشكر ربنا على اى حاجة حصلت وعاوزينه يزيدهالنا "وان شكرتم لأزيدنكم " وفيه حاجات اساسية بحب اشكر ربنا بيها وبجد فرحانة ييها جدا اولل انه خلقنا مسلمين من غير تعب ثانيا انه خلقنا اصلا كان ممكن ميبقاش لينا وجود لولا انه خلقنا ثالثا انه هدانا للصلاة وانه كمان رحيييييييم جدا

-فى الاخر لازم نعرف ان اقرب مايكون العبد لله وهو سااجد ندعيه ونطلب منه اى حاجة وهو كريم وغنى ان شاء هيستجيب اللى بنتمناه لانه قال "ادعونى استجب لكم " وقوله حق وصدق ووعده حق

صدقونى لو عملتوا كدة وجاهدتوا نفسكوا تخشعوا فى الصلاة ونويتوا كدة هتكون الصلاة متعة وراحة واسترخاء لكل اجزاء الجسم والروح الصلاة دى معجزة فى الشعور بااراحة واننا نجاهد نفسنا علشان نوصل لكدة احسن من اننا نأديها كفرض وخلاص صدقونى ربنا مخلقش اى حاجة الا وفيها راحة لينا

ادعولى ربنا يقرب منى خطيبى ويحبنى ويجملنى فى عينه ويجمعنى بيه فى الحلال وميشوفش غيرى ابدا ويرزقنى منه الذرية الصالحة وليكم بالمثل

استغفرك يا الله استغفرك يا الله فتكات هايلة Fatakat 605007 القاهرة – مصر

سبحان الله و بحمده

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.