إزيكم يا فتوكات، يا رب تكونو بخير
أنا دلوقتي بفضل ربنا قربت أنتهي من الشهر السادس
والدكتورة اللي متابعة معاه هو محمود نيازي في كوبري الخشب، دكتور طيب وكبير في السن ومحترم، لكن خوفت أولد معاه لأكتر من سبب، لذلك قررت أخيرا إني أسيبه، أولا لأني بقعد كتير جدا عقبال ما أدخل الكشف (ساعتين على الأقل) حتى لو حاجزة، ولأنه كبير في السن وخايفة من أي مفاجآت تحصل وقت الولادة، وكمان زحمة عيادته مش طبيعية فخايفة أكون بولد يتأخر عليا، كمان المستشفى اللي بيولد فيها مش ناس كتير بتروحها وغالية شوية، لكن هو كدكتور شاطر ومحترم وأي واحدة تحب تتابع معاه وعندها وقت تروحله وهي مطمئنة، وفي موضوع الولادة يمكن أنا ببالغ لكن طبعا كل واحد وراحته النفسية.
نيجي بقى للجزء التاني، أنا حاولت أقرا كتير عن المستشفيات والولادة فيها، وبصراحة لاقيتني مايلة لمستشفى " الجابري" ناس كتير تعليقاتها عنها كويسة، وقولت خلاص بما اني على مشارف السابع أروح اتابع في المكان اللي هاولد فيه مع الدكتور اللي ربنا يكرمني بإذن الله وأولد معاه
قرأت كتير جدا هنا عن مستشفى الجابري باعتبارها في فيصل وانا ساكنة في المريوطية، يعني مش بعيدة أوي، ولاقيت الناس بتشكر أوي في دكتورين هم محمد علي وأيمن هاني، واحد جاي بكرة وواحد جاي بعد بكرة، يعني لسة قدامي وقت.
أنا دلوقتي بسأل كل فتوكة هنا سمعت أو جربت مستشفى الجابري تجاوبني بأمانة
أتابع هناك مع مين فيهم دكتور أيمن ولا دكتور محمد؟
أولد هناك ولا أختار مكان تاني أحسن في فيصل؟
لحظة الولادة في مستشفى الجابري عاملة ازاي، أي فتوكة ولدت هناك بالله عليكي توصفيلي اللي حصل لحظة بلحظة لأني مرعوبة جدا ونفسي أعرف الدنيا بتمشي إزاي
ربنا يكرمكم جميعا ويبارك لكم إن شاء الله ويجازيكم خير عن قراءة كلامي والرد عليه
برنادت جونز برنادت جونز فتكات نشيطة Fatakat 741275 الجيزة – مصر