دى تاني مره اكتب فى قسم العنايه بالشعر والسبب في كده ان فيه فتوكه زي العسل اسمها سوكه العسل هيا اللي طلبت مني أكتب تجربتي عشان الناس كلها تستفيدفياريت بقه تشجيع يا جماعه عشان اكتبلكم علطول.
انا شعري كان زمان حلو قوي وتقيل لحد كده من 10 سنين بدأ يقع وبأه مقصف وناشف وخفيف جدا وكان أي حد يشوف شعري يقولي انتي ايه اللي جري لشعرك أنا عاوزه أقولكم يا جماعه ان أنا كنت كل ما أشوف شعري ابقي عاوزه أعيط ده بقي اقل من النص وطبعا جربت كل الوصفات و الزيوت وزيت جدايل وكل حاجه ممكن تتخيلوها ومفيش فايده واللي زود الطين بله زي ما بيقولوا اني روحت للكوافيره اقصه ضاع أكتر وبقي قصير جدا فضلت أعيط يومين بعد ما رجعت من الكوافيره لأن شعري قصر جدا وبقي وحش جدا وأنا مكنتش عاوزاه كده خالص . المصيبه اني بعد كده حسيت انه مبقاش يطول يعني بدل ما كان خفيف بس بأه خفيف وقصير ومش بيطول كمان.
المهم قريت موضوع كانت كاتباه فتوكه عن التقشير الكيميائي وكانت كاتبه في نهاية الموضوع كده " وشى كده تمام الحمد لله بس عاوزه اروح للدكتوره تعملى ميزوثيرابى لشعرى عشان خفيف اوى انا سمعت كذا حد ب بيقول انه الميزوثيرابي ده بيطلع شعر جديد وبيتقل."
وفعلا بعتتلي التفاصيل علي الخاص ورحت ولقيت هناك بنوته كانت عامله شعرها ميزو ثيرابي بماده اسمها الخلايا الجزعيه من 3 شهور وانها لقت شعر كتير جدا نبت لدرجه انها بقي عندها قصه من قدام وشعرها طول جدا , ولما سألتها هي جايه تاني ليه قالتلي انها عاوزه تعمله تاني من كتر ما هو عاجبها .
بصراحه اتشجعت وقولت هعمله ولما سألت عن الخلايا الجزعيه دي عرفت أنها أحدث تقنيه حتي الان لتطويل الشعر وأعاده انبات الشعر و تأخير ظهور الشعر الابيض .وكمان سمعت الكلام ده في التليفزيون وعرفت ان التقنيه دي بتستخدم كمان في الميزوثيرابي بتاع الوش لانها بتأخر ظهور التجاعيد .
المهم عشان مطولش عليكوا ,الكلام غير التجربه خالص بجد تحفه . أولا الدكتوره ايدها سريعه جدا في الحقن مكونتش بحس بيها خالص ولا وجع ولا بنج ولا أي حاجه من الكلام ده خالص . هما كانوا عباره عن أربع جلسات بين كل جلسه والتانيه اسبوع وفيه فيتامينات كده كتبتهالي الدكتوره أثناء الفتره دي وكانت الجلسه بتستمر مده نص ساعه تقريبا مكنتش باحس غير بشكشكه بسيطه قوي مش وجع خالص.
وبدات النتيجه تظهر من الجلسه التالته لقيت الناس خدوا بالهم ان شعري طول واتفاجئت وانا باتسرح ان شعر صغير قوي قوي بدأ يملي فراغات فروة راسي مكونتش مصدقه اللي بيحصل لحد ما وريته لأهلي واصحابي لقيتهم لاحظوا هما كمان الفرق لدرجة ان واحده من
أصحابي قالتلي لازم توديني المره الجايه معاكي عشان أعمله أنا كمان خصوصا ان السعر كمان كان مناسب جدا .
حبيت أفيدكوا بتجربتي وادعولي بأه ربنا يتمم شفاء شعري علي خير ومتنسوش التقيم عشان اتشجع واكتبلكوا مواضيع كتير .أحبكم في الله
sassoubaic sassoubaic ممنوعة من المشاركة Fatakat 608912 abasia – egypt
سبحان الله و بحمده