السلام عليكم ورحمه الله وبركاته
ازيكم يافتوكات ياحوامل ياللي جايبين اخركم زيي
انا جايه انهارضه احكيلكم قصه حصلت معايا بخصوص موضوع بنت ولا ولد والعلامات المشتركه بين البنات وبين الصبيان والسونار اللي بيغلط والاحساس وكووووووووووووووووول دااااااااااااااا
انا اول حمل ليا كان صعب اوي في بعض الحجات زي :
لم عملت التحليل ظهرلي خطين تقال اوي وواضحين
ترجيع من قبل ماعرف اني حامل
دوخه لاقل سبب ومش الصبح بس لا دا في كل وقت
فوران في جسمي بطريقه غير طبيعيه
تقل في البطن وفي الجسم وفي الحركه من الشهر الخامس
تخنت 15 كيلو
اتوحمت على كل حاجه مسكرة واهمها كان الخوخ لاني ملقتوش طبعا ونزلت لفيت عليه اسكندريه كلها مكنش فيه
شعر الجسم كان عادي جدا
كان شكلي وحش ومنخيري نفشت جداااا
كانت بتجيلي كرشه نفس في الشهر السابع ومع كل مرة بحس اني هموت
بطني كانت صغيره بس كانت عريضه
الحركه كانت كلها لفوق وكانت بسيطه وخفيفه
كنت بقرف من الاكل اوووووووووي خصوصا اللحمه والفراخ وريحه رز السمك
كل اللي حواليا كانو بيقولولي شكلك حامل في ولد لان شكلي كان وحش بس انا احساسي انها كانت بنوته
واتحركت في اخر الخامس
عرفت نوع البيبي في اول يوم في الشهر الرابع وكنت مبسوطه اوي انها بنت والحمد لله ربنا بعتهالي بالسلامه وسميتها ليان
نيجي بقى للحمل دا
معرفتش اني حامل غير من التحليل بعد فتره كبيره لان الدورة دايما مكنتش مضبوطه فمكنتش بحط في بالي غير لم طولت اوي
لم عملت التحليل ظهرلي خط خفيف وخط تقيل
حاسه جسمي خفيف وكاني مش حامل ولا حاجه وكنت بتحرك براحتي ونقلت كمان من شقتي عادي جدا وانا حامل في 3 اسابيع بس
مفيش ترجيع ولا دوخه ولا غممان
باكل عادي جدا مش قرفانه من الاكل وباكل كل حاجه
كان نفسي بتروح للحجات العبيطه زي الشبسي والبيبسي والجبنه القديمه والفطير
وزني نزل عن قبل الحمل وخسيت اوي
وشي متغيرش بس عنيا اسودت من الانيميا
شعر جسمي اختفى
فوران في الجسم مع اقل حركه
شكل البطن مدورة لقدام اوي والجناب فاضيه
الحركه كلها تحت عند المثانه وقويه جدا
بدات الحركه في الشهر الثالث
عملت سونار اول يوم في الرابع زي معملت في بنتي والدكتورة قالتلي ايييييييييييه بصي بقى اللي انا شايفاه قدامي دا مينفعش يكون اي حاجه غير ولد دا 80%ولد وانا بقى فرحت جداااااااااااااااااااااا ومروحه مزقططه في الشارع واتصلت بجوزي فرحته لانه نفسه في ولد وقولتله مبروط يابو ريان لاننا اتفقنا لو ولد هنسمي ريان
بدات عندي التهابات من اول الحمل وزادت جدا في اول الخامس واضطريت اروح لدكتورة تانيه قريبه مني لقيتها بتعمل سونار وبتقولي متقلقيش البنوته بخير وانا هكتبلك على حاجه للاتهابات انا بقى عملت كدابنوته مييييييييييييييين دول قالولي ولد وجوزي واقف حاضر الموقف وبقيت مضايقه جدا مش عشان بنت بس عشان جوزي اتعشم انه ولد وروحت من عندها وانا مش مصدقه وعماله اكدب كلامها وقولت لا انا احساسي من اول الحمل انه ولد اكيد السونار غلطان وفضلت افرك عشان اعمل سونار بعدها بكام يوم وروحت لنفس الدكتورة اللي قالتلي ولد سالتها هو البيبي نوعه ايه كانها مقالتليش قب كدا ولا حاجه قالتلي دا واخد وضع السجود وفضلت تحاول وتعرف لكن للاسف وروحت من عندها برضه عامله كدا
انهارضه بقى كان في ظروف واضطريت اسافر ارجع في نفس اليوم يجي 8 ساعات سفر وفي المواصلات بقى وانتو عارفين الحر الجميل بتاعنا والمطبات اللي في الطرق النضيفه بتاعتنا وروحت تعبانه جدااااااااااااااا جيت ادخل الحمام معرفتش بسبب حرقان البول ونسبه الصديد العاليه روحت واخده بعضي وعلى اقرب مستشفى عدل لدكتورة تالته كتبتلي على علاج عاشر مرة للاتهابات اللي مبتروحش وقالت يلا نطمن على البيبي واذ فجاه بتقولي بنوته شقيه بتتحرك كتيييييييييير انا بدل مكمل اسئلتي واشوف انا عايزاها في ايه بقيت عامله كدا
وروحت مضايقه جدا صعبان عليا جوزي اللي اتعشم بالولد لاني مش ناويه اخلف تاني خلاص
انا بقى كتبت الكلام دا ليه
عشان كل واحده بتيجي تسال زي حالاتي اهم علامات الحمل في بنت وولد
هو لو شكلي كذا ابقى حامل في كذا
انا عملت اختبار الملح وطلع كذا
انا احساسي بيقول كذا مش دايما احساسك بيطلع صح مرة يصيب ومرة يخيب وارد انا من كتر ماتمنيت اني اكون حامل في ولد حاسه اني عشمت جوزي اكتر من الدكتورة لانه كان عنده امل
وفي الاول وفي الاخر اللي بيدي الولد والبنت هو ربنا منتبطرش احنا بقى على النعمه اللي بيديهالنا
ينفع لم حد انتي بتحبيه يجبلك هديه ويدخل بيها عليكي تقوليله لا بس انا كنت عايزة كذا بدالها
فتخيلي دا بقى ربنا العاطي الوهاب ينفع يدي بنت تقوليله لا انا كنت عايزة ولد
ربنا بيدي البنت والولد وبيبقى ليه حكم واسباب في دا لانه مبيخلقش حاجه كدا عبثا
لازم كلنا نقول الحمد لله الحمد لله الحمد لله على النعمه اللي غيرنا محروم منها
معلش طولت عليكو بس انتو حبايبي ولازم اريحكو زي مارتحت وفي الاخر هقول
واللي تستفيد من موضوعي ياريت متنسانيش في التقييم يابنات :
سمسم_89 سمسم_89 ممنوعة من المشاركة Fatakat 887588 اسكندريه – مصر