السلام عليكم ورحمة الله وبركاته
إزيكم يا اجمل فتوكات انا اول مره اكتب في القسم الاسلامي بس اتمني اني اللي هاقوله يفيد اي حد فيكم ,, بدون رغي كتير انا كنت ساعات بأخر الصلاه وبصلي ظهر مع عصر او مغرب مع عشاء بس الحمد لله انا ماعنديش المشكله دي دلوقتي ربنا يثبتني انا وكل المسلمين والمسلمات يارب
والسبب جمله قالهالي خطيبي ربنا يبارك فيه ويسعده ويرزقه ويجعل نصيحته ليا دي في ميزان حسناته لازم الواحد ينسب الفضل لأهله والفضل لربنا سبحانه وتعالي في الاول والاخر
المهم ,,انا كنت ببقي متضايقه من نفسي في الاوقات اللي كنت بأخر فيها الصلاه و اول ما بسمع الاذان علي قد ماكنت بحس بإن إبر بتشوكني علشان اقوم اصلي علي اد ما الشيطان كان ساعات بيغلبني ربنا يحفظنا جميعا
بس لما خطيبي قالي [ربنا مش بيبارك في عمل بيلهي عن الصلاه] انا سمعت الجمله دي قبل كده كتير بس ماكنتش بفكر فيها او بمعني ادق مش بطبقها بس قولت طيب ما اجرب اقولها لنفسي عند كل صلاه ومن ساعتها اول ما الاذان يأذن واقولها لو في ايدي حاجه لازم اسيبها واقوم اتوضا لو داخله اعمل اكل اقول لنفسي ربنا مش هايبارك في الاكل لو اجلت الصلاه علشانه ده ممكن يتدلق علي اخر لحظه وحصلت معايا قبل كده
لو بشتري لبس انا وصحباتي مثلا والاذان اذن بندور علي اقرب جامع نصلي فيه وبجد ما اقولكمش ربنا بييسر الحاجه اللي اجلتيها علشان الصلاه اد ايه ماشاء الله لو بتاخدي ساعتين علشان تخلصي الاكل هاياخد منه ساعه لو بتدوري علي لبس ومش لاقيه حاجه كويسه ربنا بيكرم كده بمحل يكون فيه طلبك بالظبط
اللي عايزه اقوله يا بنات الصلاه بركة وراحه ونور طول اليوم
الحمد لله علي نعمة الاسلام وربنا يثبتنا جميعا انتم وانا وكل المسلمين والمسلمات
انا حبيت اقولكم تجربتي الصغنونه يارب تفرق او تساعد حد في انه يصلي الصلاه في مواعيدها
واترككم في رعاية الله
h.kamel8 h.kamel8 فتكات هايلة Fatakat 458222 الجيزه – مصر
