تخطى إلى المحتوى

ايـــــــاك والــتـــكبــر ففـــاعــله لا يــدخــل الــجــنــه

  • بواسطة

بسم الله الرحمن الرحيم

والحمد لله رب العالمين والصلاه والسلام على المبعوث رحمه للعالمين محمد وعلى اله وصحبه اجمعين الى يوم الدين وبعد

هنتكلم اليوم عن خلق ذميم ..

عن صفه بيتصف بيها كتيير اووى من الناس عن صفه ممكن تدخل صاحبها جهنم والعياذ بالله عن صفه تكسب صاحبها الذل والهوان من الله عز وجل عن صفه بسببها الناس تكره صاحبها وتبغضه وتبعد عنه

هــــنـتـكـلم عــن الــتــــكــبــــــر

التكبر يا اخوتى هو التعالى على الناس


فالانسان المتكبر ده يشعر ان منزلته ومكانته اعلى من منزله غيره وانه هو الكل فى الكل وان الناس تحتيه مثل الذباب فى كتيييير اووى يا جماعه فيهم صفه التكبر

فنلاقى مثلا ..

واحد يتكبر بعلمه ..

يكون ربنا اكرمه ومن عليه بنعمه العلم الشرعى فنلاقيه متكبر ويحتقر غيره .. وعاوز الناس تنحنى ليه وتقبل ايديه ويحملوا ليه حذائه وتاخده العزه كده ولو مر على الناس ومحدش قام ليه يغضب ولو حد نصحه او رده يغضب ويرفض النصيحه فبكده هو هيهلك نفسه وعلمه مش هينفعه


وفى من الناس اللى يتكبر بالحيب والنسب


يقولك متعرفش انا مين وابن مين ؟؟ انا جدى الباشا الفلانى وعمى فلان الفلانى وخالى البيه اللى معاه القصور الفلانيه فى بلد كذا وكذا


وفى من الناس اللى يتكبر بالسلطان والجاه


يكون ربنا اكرمه برئاسه او وزاره او قياده او يتولى اى منصب او اى سلطه .. فنلاقيه يتكبر على الناس ويظلمهمم

ولو واحد فقير كلم واحد من دوول يقوله انت نسيت نفسك مين ؟؟ انت مش عارف بتكلم مين ؟؟

فنلاقيه يتكبر ويتعالى على الناس علشان هو وزير او رئيس او صاحب السلطه الفلانيه والناس تحتيه مثل الذباب

وفى من الناس اللى يتكبر بكثره ماله


واحد غنى معاه فلوس كتير . معاه عقارات وعمارات وفلل وقصور واطيان وشركات وشايلهات فنلاقيه متكبر .. يتكبر على الفقير .. يتكبر على الضعيف ويبص للناس دى نظره احتقار وازدراء علشان منزلته هو اعلى من منزله الناس دى

فلو مثلا ..

واحد فقير عاوز يناسب واحد غنى .. عاوز يجوز ابنه لبنت واحد غنى

فنلاقى الغنى ده يقول انا اجوز بنتى لفلان ده ؟؟

الناس دى مش من مستوانا .. دول مستواهم متدنى.دول ناس كذا وكذا بكل تكبر وتجبر والعياذ بالله


وفى طالب المدرسه او طالب الجامعه

اللى يتكبر على استاذه علشان والده غنى ومعاه فلوس ومنصبه كبير فيحتقر استاذه وزمايله اللى معاه ويتعالى عليهم

وفى الرئيس اللى يتكبر على مرؤسيه


ويعاملهم كانهم عبيد عنده


وفى واحد تانى من مستوى راقى وعايش فى رفاهيه مفرطه

وعنده مركز مرموق او صاحب فكر او قلم او وجاهه .. فيتكبر على الفقراء ويتعالى عليهم ويبصلهم نظره احتقار وازدراء نلاقيه لابس اللبس الفلانى والعربيه اللى موديلها كذا والبودى جارد الضخم والحرس

وكانه بيمشى على الارض ويقول يا ارض اتهدى ما عليكى ادى


دى يا اخواتى صور من التكبر موجوده بصوره كبيره اوى فى واقعنا وفى كتيير مننا مبتلى بالداء ده ولا حول ولا قوه الا بالله

ده لو يعرف المتكبر عقابه ايه والوعيد الشديد اللى منتظره فى الاخره مكنش فكر انه يتكبر ويتعالى على الناس

طيب تعالوا نشوف ايه هى عقوبه الانسان المتكبر ايه


ربنا عز وجل يا اخواتى توعد المتكبرين بالعذاب الشديد

قال جل وعلا ..

سأصرف عن آياتي الذين يتكبرون في الأرض بغير حق

ويقول تعالى..

أليس في جهنم مثوى للمتكبرين

وربنا عز وجل يكره المتكبرين

قال الله تعالى ..

إن الله لا يحب المستكبرين

وقال تعالى..

كذلك يطبع الله على كل قلب متكبر جبار

والنبى صلى الله عليه وسلم حذرنا من التكبر وامرنا اننا نبعد عنه

فقال صلى الله عليه وسلم

لا يدخل الجنة من كان في قلبه مثقال ذرة من كبر

مسلم وأبو داود والترمذي

يـا الــلــه


اللى فى قلبه مثقال ذره انت شوفت الذره قبل كده ؟؟

لا والله الذره دقيقه جدا محدش يقدر يشوفها بعينه المجرده شوفت اد ايه الامر خطير اللى فى قلبه مثقال ذره من التكبر مش هيدخل الجنه الجنه هتضيع منه


يا الهى .. والله حديث يرعب


هـــــا .. ما تيجى نفتش فى قلوبنا دلوقتى بسرعه ونشوف هل فى قلوبنا الداء الخبيث ده ؟
هل احنا فينا الصفه الذميمه دى ؟؟
هل احنا بنتكبر على الناس ونتعالى عليهم ؟؟؟

لو فينا الصفه دى هقولك الحق اغسل قلبك قبل ما الجنه تضيع منك

يبقى الانسان المتكبر اللى فى قلبه مثقال ذره من كبر بس مش هيدخل الجنه


لا مش كده وبس اسمع النبى صلى الله عليه وسلم بيقول ايه فى المتكبرين وازاى هيحشروا يوم القيامه

يقول صلى الله عليه وسلم ..

يُحْشَرُ المتكبرون يـوم القيامة أمثـال الذَّرِّ. في صور الرجال، يغشاهم الذل من كل مكان، فيساقون إلى سجن في جهنم يسمى بُولُس، تعلوهم نار الأنيار، يُسقَون عصارة أهل النار طِينَةَ الخبال الترمذي

يــا الــلــه

والله لتقرا الحديث ده مره تانى وتركز فى كل لفظه فيه


المتكبرون هيحشروا يوم القيامه امثال الذر .. يعنى زى النمل الصغير كده ولكن فى صوره رجال

تخيل معايا كده ..

راجل اد النمله وماشى مذلول عليه الذل والهوان ويتساق الى سجن فى جهنم والعياذ بالله اسمه بولس ويشرب من عصاره اهل النار


والله يا جماعه حديث يرعب


المتكبر اللى بيتعالى على الناس فى الدنيا علشان هو غنى او معاه سلطه او منصب او جاه هيكون حاله كده فى الاخره عليه الذل والهوان من الله


وكمان يا اخواتى


ربنا خسف الارض بواحد متكبر .

اسمع النبى صلى الله عليه وسلم بيقول ايه

عن أبي هريرة رضي الله عنه أن رسول الله صلى الله عليه وسلم قال.. بينما رجل يمشي في حلة تعجبه نفسه ، مُرجّل رأسه يختال في مشيته إذ خسف الله به الأرض ، فهو يتجلجل فيها إلى يوم القيامة متفق عليه

واحد كان لابس ثوب شكله جميل وممشط شعره وداهنها بالزيت وماشى وهو معجب بنفسه ويختال فى مشيته ربنا عز وجل خسف بيه الارض فهو عمال يغوص وينزل فى باطن الارض لغايه القيامه ما تقوم

ايه ده هو انا لما البس لبس جميل واهتم بنفسى ومظهرى ابقى متكبر ؟ امال البس يعنى لبس مقطع واسيب شعرى منكوش علشان ابقى متواضع ؟؟

لا متخفشى السؤال ده ساله اصحاب النبى صلى الله عليه وسلم


قال رجل ..

إن الرجل يحب أن يكون ثوبه حسناً ، ونعله حسناً ؟ قال النبى إن الله جميل يُحب الجمال ، الكِبر بطرُ الحق وغمط الناس رواه مسلم

يعنى واحد من اصحاب النبى قاله الواحد بيحب ان يكون لبسه شكله جميل ولابس حذاء اعزك الله .. شكله جميل . فهل كده يبقى متكبر فالنبى صلى الله عليه وسلم قال ان الله جميل يحب الجمال

ولكن الكبر هو عدم قبول الحق ورده على قائله وغمط الناس

يعنى احتقار الناس

والمتكبر ده يا اخواتى من اهل النار والعياذ بالله


عن حارثة بن وهب رضي الله عنه قال سمعت رسول الله صلى الله عليه وسلم يقول ألا أخبركم بأهل النار ؟ كل عتل جواظٍ مستكبر متفق عليه

العتل يعنى الغليظ الجافي

الجواظ يعنى الضخم المختال في مشيته .

فالمتكبر اللى يختال فى مشيته ربنا غضبان عليه

والدليل ..

كما قال رسول الله صلى الله عليه وسلم في الحديث الصحيح الذي أخرجه البخاري في الأدب المفرد

ما من رجل يتعاظم في نفسه ويختال في مشيته إلا لقي الله تعالى وهو عليه غضبان

وعن أبي سعيد الخدري رضي الله عنه عن النبي صلى الله عليه وسلم قال

احتجت الجنة والنار فقالت النار فيّ الجبارون والمتكبرون ، وقالت الجنة : فيّ ضعفاء الناس ومساكينهم ، فقضى الله بينهما أنك الجنة رحمتي أرحم بك من أشاء ، وأنك النار عذابي أعذب بك من أشاء ولكليكما عليّ ملؤها مسلم

وعن أبي هريرة رضي الله عنه قال قال رسول الله صلى الله عليه وسلم قال الله عز وجل العز إزاري ، والكبرياء ردائي ، فمن ينازعني عذبته مسلم

هــا بعد الكلام ده لسه برضو مصر على التكبر ؟؟؟

هو حضرتك عاوز تخسر الجنه وعاوز تحشر يوم القيامه وانت اد النمله فى الارض وماشى وعليك الذل والهوان من ربنا وتتساق لسجن فى جهنم والعياذ بالله ؟؟؟

ولا عاوز تكون من اهل النار ؟؟؟
ولا عاوز ربنا يخسف بيك الارض ؟؟ ولا عاوز ربنا يغضب عليك ؟؟ ولا عاوز ربنا يعذبك ؟؟ ها عاوز ايه من دول ؟؟؟ وبعدين ليه يا اخى التكبر ؟؟

حضرتك متكبر علشان معاك فلوس كتتتتتتير ؟؟

طيب ما ربنا قادر يسلبك كل اموالك وترجع ذليل مش معاك حاجه خالص ويمكن كمان تمد ايدك للناس اللى اتكبرت عليها ؟؟

ولا حضرتك متكبر علشان معاك سلطه او منصب او قياده او شهاده عاليه ؟؟

او بتشتغل فى شغلانه فلوسها كتيره ؟؟

هقولك ربنا برضو قادر يفقدك كل ده وترجع ذليل وتخسر كل حاجه يا جماعه عاوزين الليله دى نفتش فى قلوبنا ونشوف هل احنا فينا الداء الخبيث ده ؟؟

لو لقيت المرض ده فى قلبك هقولك اغسل قلبك بالتواضع واتخلص من التكبر قبل ما يهلكك وتواضع للناس

يا اخى قلد النبى صلى الله عليه وسلم واقتدى بيه وشوف ازاى النبى كان متواضع مع كل الناس

ازاى كان بيعاملهم .. واتعلم من النبى

وحط فى بالك ان كل النعم اللى انت فيها من فضل ربنا عليك وربنا قادر انه يسلبك كل اموالك ومناصبك وترجع ذليل نتوب لله عز وجل قبل فوات الاوان

اخوتى .. اكتفى بهذا القدر وصلى اللهم على محمد وعلى اله وصحبه اجمعين والسلام عليكم ورحمه الله وبركاته

سجوود سجوود فتكات متميزة Fatakat 714165 القاهره – القاهره

لقراءة ردود و اجابات الأعضاء على هذا الموضوع اضغط هناسبحان الله و بحمده

الوسوم:

اترك تعليقاً

لن يتم نشر عنوان بريدك الإلكتروني.

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.