السلام عليكم
ازيكوا يا بنات اخباركم ايه
طبعا فيه كتير مستنيين اي حد ييجى يطمنكم على الريمنجتون ويت توستريت بعد مواضيع العسل قمر 2024 عنها اللي حمست ناس كتير انها تشتريها
طيب استنوا متزقوش بس هدخل في الموضوع اهو
بصوا بقى يا بنات انا بعد ما استخرت ربنا كدة بعد ما قرات مواضيع قمر قررت اني هجيب المكواه دي
اخترت الويت تو ستريت بالذات :
لان شعري مش بايظ لدرجة الكيراتين ثيرابي ( وبينى وبينكم غالية برده هتوصل ل 800)
ولان البرل قمر قالت انها منفعتش معاها في مصر علشان الرطوبه وانها مصممة علشان البلاد الباردة قولت خلاص لما اروح اقضى الويك اند في اوروبا ابقى اتري واحدة مخصوص هههههههه
المهم جبت بقى الموديل ده واخترت الرفيعة علشان تبقى خفيفة في ايدى وسهله خصوصا ف الاماكن القريبة من فروة الراس لان ده كمان اول استخدام لسا لمكواه شعر
نيجى بقى للمهم
رووووووووعة يا بنات جامدة جامدة جامدة بجد ما شاء الله والله
انا على فكرة صبغت شعرى قبل ما استخدمها وعاملة هايلايتس كمان يعنى شايفة خطوط الهايلايتس الفاتحة مفرودة ازاي قدامي ما شاء الله وده بينلى كفاءة المكواه ما شاء الله من اول ضربتين للمكواه الشعر اتفرد يعنى اتوقع لو واحدة شعرها خشن جاامد هتاخد 4 او 5 مرات وهيفرق معاها بشكل ملحوظ ان شاء الله
الهيشان : انا عارفة انه موضوع مقلق انا بصراحة يا بنات النص اللي كويته ( اصلى لسعت قفايا مرتين فقلت استريح شويه هههههههه) مكوي بقاله 6 او 7 ساعات ومفيش اي هيشان انا حطيت نقطتين سيروم زيرو فريز قبل ونقطيتن بعد طبعا السيروم ميغنيش عن واقي الحرارة بس انا لسة ملقيتوش هنا وكنت مستعجلة اجرب علشان اعملكوا الموضوع فقولت مش مشكلة من مرة يعنى
اللمعة : بصراحة يا بنات مش قادرة احكم عليها علشان شعري مصبوغ فمش باين بس بيتهيالي السيروم بيتحكم في الحته دي فمفيش منها قلق ان شاء الله
تشغيل المكواه نفسها : بصوا سهله جدا
اول حاجة هتحطوا الفيشة وتدوسوا على زرار ال onoff ولو سمحتوا يا بنات دوسوا تييييييت مش تييت يعنى تعالوا على نفسكوا وطولوا الضغطة شويه المكوا مش هيحصلها حاجة ليه بقى لان انا اول لما جبتها بقيت يدوب اعمل تيت والاقيها متنورش ادوس تاني ودي متنورش لما اتخضيت وقولت بس المكاه بايظة ولفيت بيها على فيش البيت كلها هههههه واتنكدت وقولت دي شركة سيئة وتوكيل سيئ ههههه وقال ايه احط ايدى جنيب السيراميك بتاعها وابعدها بسرعها قال يعنى قبل ما اتلسع قال يعنى بوهم نفسي انها تكون اشتغلت وانا مش واخدة بالي وهي مطفية اساسا ههههههههههه
المهم بطلوا ضحك وهزار بقى اول ما هتشتغل هتتنور ازرق والشاشة هيبقى عليها درجة الحرارة وسحابة وده معناها ان ده وضع الشعر الرطب ( المندى يعنى اللي قرب يبقى ناشف مش الشعر المبلول اللي هيقول تشششش هههههه)
وعندك تحت الشاشة 4 زراير فقط زرار التشغيل وزرار يحول من وضع الرطب للجاف او العكس ووضع الجاف ساعتها الشاشة بتنور اخضر
وزرار يزود الحرارة وزرار يقللها
عندك بقى ميزتين
الاولى : لما هتزبطى درجة الحرارة : هتيبى المكواه تسخن ثوانى وهتوصل لدرجة الحرارة ما شاء الله هتديكى كام صفارة كدة ورا بعض معناها انها كدة جاهزة ووصلت للدرجة المطلوبة
الثانية : زرار (-) بتاع تقليل الحرارة لو دوستى عليه ثانيتين متواصل بيثبت درجة الحرارة علشان ايدك متغيرهاش غصب عنك وانتى بتكوى ومتاخديش بالك
وطبعا يا بنات المكواه بتفصل اتوماتيك بعد 60 دقيقة وانتي بتشغليها تاني
بصوا يا بنات انا مستخدمتش مكواه غيرها بس بصراحة النتيجة بالنسبة لي حلوة جدا جدا جدا ما شاء الله علشان لو فتوكة تانية جابتها وكان شعرها اقل مني وموصلتش للنتيجة دي بالظبط عاوزة بس اقولها اكيد كلنا مش هنوصل لنفس النتيجة بس الاكيد ان شاء الله ان شعرنا هيبقى احسن من الاول واحسن من اصله مش عاوزين نضحك على نفسنا خليها بينا وبين بعض احسن
يلا بقى يا بنات عاوزة دعوات حلوة وتقييمات واللي عاوزة اي استفسار انا تحت امرها
تعديل يا بنات انا نسيت اكتب المكان والسعر : هي من توكيل ريمنجتون في سبينس مدينة نصر كنت جايباها ب 400 بس كان فيه عرض وكانت قبل العرض ب 480 وموديلها بالظبط : wet 2 straight s7902
زمزومة زمزومة images/avatars/yellowflower.jpg سوبر فتكات Fatakat 191511 المنصورة – مصر